«Насаф» — «Ал Ваҳда»: Қаршида ҳал қилувчи баҳс олдидан таркиблар маълум
Осиё футболида муҳим ҳафта бошланди — ОФК Элит Чемпионлар Лигасининг 4-тур баҳслари старт олмоқда. Ғарб минтақасидаги беллашувлар орасида мухлислар эътиборини Қарши шаҳрида бўлиб ўтадиган “Насаф” – “Ал Ваҳда” учрашуви тортмоқда. Бу ўйин жамоалар учун турнирдаги тақдирий аҳамиятга эга.
“Марказий” стадионда бўлиб ўтадиган баҳс соат 18:45 да старт олади. Ушбу беллашувни мухлислар жонли равишда SportTV орқали кузатишлари мумкин.
“Насаф” бугун ўз уйида мухлислар қўллови остида фақат ғалаба учун майдонга тушади. Рўзиқул Бердиев шогирдлари учун бу ўйин жуда муҳим — чунки жамоа аввалги уч баҳсда омадсиз натижалар қайд этиб, ҳозирча очкосиз ҳолда гуруҳ жадвалида сўнгги ўринни эгаллаб турибди.
Шунингдек, “Ал Ваҳда” жамоаси ҳам бу турда ютуқ излаб келган. БАА вакиллари аввалги 3 турда 7 очко тўплаб, Ғарб минтақасидаги 12 жамоа орасида 4-поғонада бормоқда. Улар жорий мавсумда жуда барқарор ўйин намоён этишмоқда — ҳам ҳимояда, ҳам ҳужумда жамоавий ҳаракатлари билан ажралиб туради.
Бугунги баҳс олдидан ҳар икки жамоа таркиблари ҳам маълум бўлди.
“Насаф” таркиби:
Абдувоҳид Неъматов, Алибек Давронов, Ғолиб Ғайбуллаев, Аденис Шала, Зафармурод Абдураҳматов, Драган Черан, Шароф Муҳиддинов, Ҳусайн Норчаев, Стефан Чолович, Сардор Баҳромов, Шерзод Насруллаев.
“Ал Ваҳда” таркиби:
Муҳаммад, Амарал, Диарра, Жадсом, Круспки, Огбу, Пимента, Зуҳир, Горбани, Тадич, Фоля.
Қаршиликлар учун бу баҳс нафақат очко, балки обрў масаласи ҳам. Гуруҳдаги ҳолатни ўнглаш учун “Насаф”га бугунги баҳсда фақат ғалаба ёрдам бериши мумкин. Мураббий Рўзиқул Бердиев ва унинг шогирдлари кейинги босқичга чиқиш имкониятини сақлаб қолиш учун барча кучни майдонда сарф этишлари керак.
Бош мураббийнинг айтишича, жамоа таркибидаги футболчилар ўйин олдидан яхши кайфиятда ва ғалаба учун жанговар ҳолатда. “Мухлисларимизга муносиб ўйин кўрсатишни истаймиз. Биз учун ҳар бир ўйин — финал. “Ал Ваҳда” кучли рақиб, аммо биз ҳам осонликча таслим бўлмаймиз”, — деган Бердиев ўйин олдидан берган интервьюсида.
“Ал Ваҳда” томонидан эса жамоа етакчиси Мирослав Тадич асосий хавф манбаи бўлиши кутилмоқда. Унинг тажрибаси ва майдондаги хатарли зарбалари “Насаф” ҳимояси учун синов бўлади. Шунингдек, БАА клуби сафида жароҳатдан соғайган Диарра ҳам таркибга қайтгани қайд этилмоқда.
“Насаф” мухлислари бугун жамоадан фақат ғалаба кутмоқда. Бу ўйин “аждарлар” учун вазиятни ўз фойдасига буриш ва Элит ОЧЛда илк очколарни қўлга киритиш имкони. Агар жамоа мухлислар қўллови билан яхши натижа қайд этса, бу кейинги турлар учун катта руҳий куч бериши шубҳасиз.
Қаршида кечадиган бу баҳс нафақат жадвалдаги ўринлар учун, балки ном ва шараф учун жанг бўлади. Бугун “Насаф” учун барча нарса бир ўйинга боғлиқ — ғалаба ёки хушлашув.