“Нефтчи”, “Насаф” ёки “Пахтакор” – Суперлига чемпиони ким бўлади?
Ўзбекистон Суперлигаси 2025 йилги мавсуми ҳал қилувчи босқичга кирди. Олдинда мухлисларни нафақат қизиқарли, балки жадвал тақдирини белгилайдиган ўйинлар кутиб турибди, деб хабар берди ЎзПФЛ матбуот хизмати. Ноябр ойи футбол мухлислари учун драматик, ҳиссиётларга тўла ва эҳтимол, мавсум тақдирини ҳал қилувчи палла бўлади.
Пахтакор – Бунёдкор (3 ноябрь)
Ноябр бошидаёқ мухлислар анъанавий Тошкент дербисига гувоҳ бўлади. “Пахтакор” ва “Бунёдкор” ўртасидаги тўқнашувлар ҳар доим катта қизиқиш ва ҳиссиёт билан ўтади. “Жар” стадионида бўлиб ўтадиган бу учрашувда ҳар икки жамоа совринли ўринлар учун жанг олиб бораётгани сабаб, баҳснинг қиммати янада ошади.
Охирги йилларда “Пахтакор” чемпионликка эришиб келган бўлса-да, “Бунёдкор”га қарши дербиларда доимо қийинчиликка дуч келган. Шу сабаб, бу сафарги баҳс ҳам жуда принципиал тус олади. “Шерлар” ўйинда ғалаба қозониб, жадвалдаги мавқеини мустаҳкамлашни кўзлаяпти.
Бухоро – Нефтчи (7 ноябрь)
28-тур доирасида “Бухоро” ўз уйида чемпионлик пойгасидаги асосий даъвогар “Нефтчи”ни қабул қилади. Бу ўйин икки жамоа учун ҳам муҳим аҳамият касб этади. Фарғоналиклар учун ҳар бир очко – олтин қийматида. Улар сўнгги турларда хатога йўл қўймасликлари шарт, акс ҳолда етакчиликни бой беришлари мумкин.
“Бухоро” эса яқинда Ўзбекистон кубоги финалида мағлуб бўлганидан сўнг мухлислар олдида ўзини оқлаш имкониятини қидирмоқда. Александр Хомяков шогирдлари чемпионлик учун курашаётган рақибни ўз уйида мағлуб этиш орқали сўнгги турларга интрига киритишни истайди.
Насаф – Машъал (8 ноябрь)
Қашқадарё дербиси – ҳар доим анъанавий равишда қизиқиш уйғотган учрашув. Қаршининг “Насаф” клуби сўнгги турларда фақат гранд жамоалар билан тўқнаш келаётган бир пайтда, “Машъал” билан бўладиган баҳсда ғалаба улар учун жуда муҳим. Чунки бу уч очко чемпионлик пойгасида ҳал қилувчи аҳамият касб этади.
Муборакликлар эса Суперлигада жон сақлаб қолиш учун қаттиқ кураш олиб бормоқда. Улар учун ҳар бир очко ҳаётий аҳамиятга эга ва “Насаф”га қарши баҳсда ҳам осонликча таслим бўлмасликлари тайин.
Пахтакор – Насаф (20 ноябрь)
29-турнинг марказий ўйини айнан шу баҳс бўлади. “Пахтакор” ва “Насаф” ўртасидаги тўқнашувлар ҳар доим принципиал тусда ўтган. Охирги 6 ўйиндан 4 таси дуранг билан якунланган бўлса, ҳар икки жамоа бир мартадан ғалаба қозонган. Бу сафар эса вазият янада қизиқ — “Пахтакор” ҳам, “Насаф” ҳам чемпионлик учун жанг қилмоқда.
Ҳар икки жамоа учун ҳам бу ўйинда қўлга киритиладиган очколар тақдирни белгилаб бериши мумкин. “Жар” стадионидаги бу тўқнашув Суперлиганинг энг кутилган ва эҳтимол, энг ҳал қилувчи учрашувларидан бири бўлади.
Нефтчи – Қизилқум (22 ноябрь)
Фарғоналиклар учун ўз майдонидаги сўнгги баҳс. Виталий Левченко шогирдлари бу учрашувда фақат ғалаба ҳақида ўйлайди, чунки чемпионлик учун сўнгги имкониятлар айнан шу ўйинда ҳал бўлиши мумкин.
“Қизилқум” эса лигада жон сақлаб қолиш учун жанг қилмоқда ва очко йўқотиш улар учун ҳалокатли бўлиши эҳтимолдан холи эмас. Шу боис, бу баҳс ҳам кескин кураш ва жонбозлик муҳитида ўтиши кутилмоқда.
Ноябр ойидаги ушбу бешта баҳс — нафақат Суперлиганинг тақдирини, балки келаси мавсум Еврокубок йўлланмаларини ҳам белгилаб бериши мумкин. Ҳар бир очко, ҳар бир зарба, ҳар бир имконият энди ҳисобга олинади.
Футбол мухлислари учун эса олдиндаги ҳафталар ҳақиқий байрам — дербилар, чемпионлик кураши ва драматик лаҳзалар билан тўла ой кутиб турибди.