Telegram орқали 1 миллиард сўм ўғирлаганлар ушланди
Тошкент вилоятида интернет орқали юзлаб фуқароларни алдаган кибергуруҳ фош этилди, деб хабар берди Ички ишлар бош бошқармаси.
Маълумотларга кўра, “Telegram” ва “Instagram” орқали “лимитлаш хизмати” таклиф қилган тўрт нафар шахс жами 600 га яқин фуқаронинг 1 миллиард сўмдан ортиқ маблағини ўзлаштирган.
2005 йилда туғилган Б.Н. ва унинг шериклари микромолия ташкилотларидан олинган кредит лимитларини “нақд қилиб бериш”ни ваъда қилган. Улар фуқароларнинг ишончидан фойдаланиб, ўзлари ташкил этган фирма орқали онлайн савдо платформаларида операциялар амалга оширган ва маблағларни шахсий фойдасига йўналтирган.
Тезкор чоралар натижасида гуруҳ фаолиятига чек қўйилди. Ҳозирда уларга нисбатан Жиноят кодексининг 168-моддаси 4-қисми “а” банди (фирибгарлик) бўйича иш қўзғатилган.
Гумонланувчилар қамоққа олинган, тергов жараёнида зарарни қоплаш ва бошқа иштирокчиларни аниқлаш ишлари давом этмоқда.