Жавоҳир Умматалиев Жаҳон чемпионатида кумуш медални қўлга киритди! (видео)
Айни дақиқаларда БААнинг Дубай шаҳрида бокс бўйича Жаҳон чемпионатининг ҳал қилувчи финал тўқнашувлари қизғин давом этмоқда. Мусобақада юртимиз шарафини ҳимоя қилаётган боксчилар жаҳон рингларида яна бир бор ўз салоҳиятини намойиш этмоқда.
-80 кг вазн тоифасида Ўзбекистоннинг маҳоратли чарм қўлқоп устаси Жавоҳир Умматалиев Россия вакили Жамбулат Бижамовга қарши финал жангини ўтказди. Беллашув юқори суръатда, қаттиқ кураш ва эҳтиёткор тактик ҳаракатларга бой тарзда кечди. Биринчи раундда Умматалиев фаоллик кўрсатиб, рақибидан кичик устунликни қўлга киритишга муваффақ бўлди.
Бироқ иккинчи ва учинчи раундларда россиялик боксчи ташаббусни қўлга олиб, очколар бўйича устунликка эришди. Жавоҳир охиригача курашиб, жангни тарк этмади, аммо натижада ҳакамлар қарори билан ғалаба рақиб томонга берилди. Шу тариқа, Умматалиев жаҳон чемпионатини кумуш медаль билан якунлаб, Ўзбекистон терма жамоаси хазинасига навбатдаги мукофотни қўшди.
Бу натижа ҳам боксчимиз учун катта тажриба, ҳам мухлислар учун ғурурли лаҳза бўлди. Жавоҳир Умматалиевнинг финалгача бўлган йўли, иродаси ва жангчан руҳи алоҳида таҳсинга лойиқ.
Эслатиб ўтамиз, жаҳон чемпионатида олдинда яна бир вакилимиз — Тўрабек Хабибуллаевнинг Россия боксчиси Муслим Гажимагомедовга қарши финал қарама-қаршилиги кутиб турибди. Мухлисларимиз навбатдаги жангда ҳам юртимиз байроғини баланд кўтаришга ишонч билдирмоқда.