"Ал Аҳли" бош мураббийи "Андижон" билан ўйин ҳақида нималар деди?
Бугун бўлиб ўтадиган “Ал Аҳли” – “Андижон” учрашуви олдидан Қатарнинг “Ал Тумама” стадионида расмий матбуот анжумани ташкил этилди. Унда мезбон жамоанинг янги бош мураббийи Юнус Али ҳамда тажрибали футболчи Ибраҳим Диалло журналистлар саволларига жавоб берди.
Юнус Али учрашув аҳамиятига алоҳида тўхталиб, “Андижон”га қарши баҳс гуруҳдаги энг муҳим ўйинлардан бири эканини таъкидлади. Унинг сўзларига кўра, жамоа сўнгги икки ҳафта давомида айнан шу ўйинга пухта тайёргарлик кўрган. Мураббий “Ал Аҳли” майдонда ўз салоҳиятини тўлиқ кўрсатишини, мухлислар олдида жамоанинг имкониятларини намоён этишни исташини айтди.
Шу билан бирга, Юнус Али “Андижон” жамоаси ҳақида ҳам ижобий фикр билдирди. У ўзбек клуби мусобақа давомида ўзини анча интизомли ва шаклланган жамоа сифатида кўрсата олганини, уларнинг ўйин услуби аниқ режа асосида қурилганини қайд этди. Мураббийнинг таъкидлашича, бугун мезбонларни осон баҳс кутмаяпти ва майдонда тўлиқ куч билан ҳаракат қилиш талаб этилади.
Матбуот анжуманининг иккинчи қисмида сўз олган Ибраҳим Диалло ҳам учрашув осон ўтмаслигини билдирди. Унинг айтишича, мавсум ўртасидаги катта танаффус жамоа учун муайян қийинчиликлар туғдириши мумкин. Чунки “Ал Аҳли” икки ҳафта давомида расмий ўйин ўтказмаган. Шу боис, майдонда ритмни тез топиш муҳим аҳамият касб этади.
Диалло янги мураббий тайинланишини футболда табиий жараён сифатида баҳолади. Унинг фикрича, бу ҳолат жамоа учун янгича нафас бўлиши мумкин. Ўйинчи жамоа ичидаги муҳит яхши эканини, футболчилар янги бош мураббийни илиқ қарши олганини ва ушбу баҳсга имкон қадар яхши ҳолатда тайёргарлик кўрилганини таъкидлади.
Журналистларнинг “Андижон”нинг ўйин услуби ҳақидаги саволига жавоб берар экан, Юнус Али рақибнинг кучли томонларини очиқ айтиб ўтди. Унинг сўзларига кўра, “Андижон” майдонда тартибли ҳаракат қилади, жамоавий ўйинга катта эътибор қаратади ва стандарт вазиятлардан самарали фойдаланишга интилади. Шу жиҳатдан улар хавфли рақиб ҳисобланади. Мезбонлар штаби айнан шу кучли томонларни нейтраллаштириш устида ишлаган.
Шунингдек, таркиб билан боғлиқ ҳолатларга ҳам ойдинлик киритилди. Юнус Али жамоада жароҳат олган футболчилар йўқлигини, сўнгги машғулот юқори кайфиятда ўтганини билдирди. Унинг айтишича, “Ал Аҳли” бугунги ўйинга тўлиқ таркиб ва максимал тайёргарлик билан чиқади.
Шу тариқа, “Ал Аҳли” – “Андижон” баҳси олдидан икки томон ҳам жиддий руҳий ва жисмоний ҳолатда эканини намоён этди. Энди барча саволларга жавобни майдондаги 90 дақиқа беради.