Хитойлик курьер 5 йил ичида катта қарзидан қутулиб, яна 160 минг доллар ишлаб топди
Хитойнинг Шанхай шаҳрида оддий озиқ-овқат етказиб берувчи бўлиб ишлаган 25 ёшли Чжан Сюецян ўз ҳаёти ҳақида сўзлаб бериб, минглаб одамларни ҳайратга солди. У беш йил давомида қаттиқ меҳнат қилиб, аввал 50 минг юан (тахминан 7 минг доллар) қарзидан тўлиқ қутулган, кейин эса 1,12 миллион юан, яъни қарийб 160 минг доллар жамғаришга муваффақ бўлган. Бу ҳақда South China Morning Post нашри хабар қилди.
Чжан Сюецян 2020 йилда оғир қарор қабул қилган. У туғилиб ўсган Чжанчжоу шаҳрида очган кичик ошхонаси банкрот бўлиб, қарзга ботганидан кейин Шанхайга кўчиб келади. Янги шаҳарда у ҳаётни нолдан бошлашга мажбур бўлган. Йигит ўз турмуш тарзини тубдан ўзгартириб, қатъий иш режимига ўтган.
У беш йил давомида деярли бир хил жадвал асосида ишлаган: ҳар куни соат 10:40 да иш бошлаб, тунги 01:00 гача буюртмаларни етказиб берган. Чжан деярли дам олмасдан, йил давомида таътилсиз меҳнат қилган. Фақат Хитой Янги йили муносабати билан бир неча кун танаффус қилишга рухсат берган, холос.
Ҳозирда у ойига ўртача 300 дан ортиқ буюртмани манзилга етказиб беради. Ҳар бир етказиб бериш учун йўлда тахминан 25 дақиқа вақт сарфлайди. Ҳисоб-китобларга кўра, беш йил ичида Чжан 324 минг километрдан ортиқ масофани босиб ўтган. Бу эса Ер шарини саккиз мартадан ортиқ айланиб чиқишга тенг масофа ҳисобланади.
Чжаннинг ўзига кўра, у деярли ҳеч қандай ортиқча харажат қилмаган.
“Кундалик энг зарур эҳтиёжларимдан бошқа деярли пул сарфламайман. Кунига тахминан 13 соат, ҳафтасига етти кун ишлайман. Овқат ва уйқудан бошқа барча вақтим етказиб бериш билан ўтади”, — дейди у.
Шу билан бирга, у соғлиғини ҳам эътиборсиз қолдирмасликка ҳаракат қилган. Чжан кунига ўртача 8,5 соат ухлашга интилган ва қатъий кун тартибига амал қилганини айтади. Бу унга узоқ муддат давомида кучини сақлаб қолишга ёрдам берган.
Ҳамкасблари унинг меҳнатсеварлиги ва интизомини алоҳида қайд этади. Етказиб бериш марказларидан бири раҳбарининг айтишича, Чжан жуда камгап, аммо ишига бутунлай берилган инсон. “Мен унинг ҳеч қачон секин ҳаракатланаётганини кўрмаганман. У доим шошилиб, деярли югуриб ишлайди”, дейди у.
Айнан шу сабабли ҳамкасблари ва интернет фойдаланувчилари Чжанни “Буюртмалар қироли” деб атай бошлашган. Ўзи эса бу натижани оддий қилиб қабул қилади: “Охир-оқибат барча қарзларимдан қутулдим ва меҳнатим эвазига анча маблағ тўпладим. Бу мен учун жуда катта ютуқ”, — дейди у.
Энг муҳими, Чжан тўплаган маблағни шунчаки сақлаб қўйишни режалаштирмаяпти. У келгуси йилнинг биринчи ярмида Шанхайда нонушталарга ихтисослашган иккита кичик кафе очишни мўлжалламоқда. Ушбу лойиҳа учун 800 минг юан (тахминан 113 минг доллар) сармоя киритиш режалаштирилган.
Шу тариқа, беш йил давом этган оғир ва машаққатли меҳнат Чжан Сюецянни нафақат қарзлардан халос қилди, балки уни янги тадбиркорлик босқичига ҳам олиб чиқди. Бу ҳикоя эса сабр, интизом ва меҳнат орқали ҳатто энг оғир вазиятдан ҳам чиқиш мумкинлигини яққол кўрсатиб турибди.