Әлмәт районы волонтерлары хәрбиләр өчен 100 маскировка челтәре үргән

Фото: Татарстанның Әлмәт районы матбугат хезмәте

Әлмәт районының Борискино авылында битараф булмаган кешеләрнең бердәм командасы эшли, алар үз хезмәтләре белән көн саен хәрбиләргә ярдәм итә. Җирле волонтерларны «Паучки» атамасы аша беләләр.

Район хакимиятендә ачыклык кертүләренчә, бер ел эчендә әлеге хәрәкәттә катнашучылар 3×7 метр зурлыктагы 100 маскировка челтәре үргән. Аларның һәркайсы техника һәм алгы сызыктагы позицияләрне маскировкалау өчен кулланыла.

Челтәр үрүдән тыш, волонтерлар авыл Мәдәният йорты базасында ярдәм штабы да оештырган. Ул эшләгән вакытта хәрбиләргә 105 килограмм сохари, 50 килограммнан артык өй токмачы, шулай ук бәйләнгән җылы оекбашлар әзерләнгән һәм озатылган.

Бу эшкә мәктәп укучылары да актив кушыла. Балалар хатлар яза, открыткалар ясый һәм хәрбиләргә теләктәшлек сүзләрен җиткерә.

Көн саен Мәдәният йортына гомуми эшкә үз өлешләрен кертү өчен 15 кеше килә.

Хәрәкәткә теләге булган һәркем кушыла ала – моның өчен Борискино авылы Мәдәният йортына мөрәҗәгать итү дә җитә.

ТР Рәисе Рөстәм Миңнеханов Татарстан Дәүләт Советына юлламасында махсус хәрби операциягә ярдәм итүдә зур өлеш керткәннәре өчен волонтерларга рәхмәт белдерде.

«Без бүгенге катлаулы чорның җәмгыятебезне берләштерүен күрәбез. Татарстанлылар йөрәк кушуы буенча безнең хәрбиләргә, аларның гаиләләренә булыша, фронтка һәм республика шефлыкка алган шәһәрләр – Лисичанск һәм Рубежное өчен гуманитар ярдәм җыя. Барыгызга да бу мөһим эш өчен рәхмәт белдерәсем килә», - диде ул.