Горецка «Бавария»дан «Атлетико»га ўтиши мумкин

«Бавария» ярим ҳимоячиси Леон Горецка Мадриднинг «Атлетико» клубига ўтиш эҳтимолини истисно қилмаяпти. AS хабарига кўра, «матрасчилар» 30 ёшли футболчини сафига қўшиб олишга қизиқмоқда.

Унинг мюнхенликлар билан амалдаги шартномаси мавсум якунлангач тугайди. Манбага кўра, футболчи «Атлетико»га кўчиб ўтишга тайёр, бироқ келажаги борасида ҳали якуний қарор қабул қилмаган.

Шунингдек, «Бавария» Леон Горецкага маошини камайтирган ҳолда шартномани узайтиришни таклиф қилиши мумкин. Бунда ярим ҳимоячи захира футболчиси ролига ҳам рози бўлишига тўғри келади.

Transfermarkt порталида немис футболчисининг нархи 15 млн еврога баҳоланмоқда. Аввалроқ унга «Ювентус» ва «Фенербахче» қизиқиш билдиргани ҳақида ҳам хабарлар тарқалган.