«СалаваТік» проекты «Әлли-бәлли, нәни чыршы» җырына клип тәкъдим итте
«СалаваТік» балалар проекты интернетта «Әлли-бәлли, нәни чыршы» җырына видеоролик премьерасын тәкъдим итте. Композиция Зөләйха Камалова шигырьләренә һәм Таңсылу Мостафина музыкасына иҗат ителгән.
Клип Яңа ел бәйрәмнәренә багышланган. Онлайн-премьерадан тыш, проект оффлайн-чаралар сериясен оештырды: ике көн дәвамында В.И.Ленин исемендәге мәдәният йортында студиядә шөгыльләнүче балалар катнашында татар телендә спектакльләр күрсәтелде.
Проект җитәкчесе Зилә Фәйзуллина мондый вакыйгаларга карата кызыксыну елдан-ел арта, дип билгеләп үтте. Аның сүзләренчә, концертларга гаиләләр белән киләләр. Бу милли мәдәни продуктка ихтыяҗ булуын раслый, диде ул.
Аудиториянең географиясе дә киңәя бара: мәсәлән, Ясминә һәм Сафия «СалаваТік»та катнашучылар белән очрашу өчен Төмәннән үк килгән.
Зилә Фәйзуллина ассызыклаганча, «СалаваТік» ата-аналарга туган телне сакларга ярдәм итә. Быел Яңа ел релизы өчен команда махсус рәвештә яшь авторларның әсәрен сайлаган. Проект 2026 елда балалар аудиториясе өчен яңа татар җырларын чыгаруны дәвам итәргә планлаштыра.