Иньяки Уильямс «Барселона»ни мағлуб этиш учун келганини айтди
Бильбаонинг «Атлетик» клуби ҳужумчиси Иньяки Уильямс Испания Суперкубоги ярим финалида «Барселона»га қарши бўладиган учрашув олдидан фикр билдирди. Ўйин 7 январь куни бўлиб ўтади. Бу ҳақда euro-football.ru хабар беради.
Уильямс 2021 йилги Суперкубок баҳсларида жамоаси тахминларга қарши равишда ҳам «Реал Мадрид», ҳам «Барселона»ни енга олганини эслатиб ўтди.
«Биз бу ўйинни жуда кутяпмиз. Бу ерга ғалаба учун келдик. Аввал ҳам шундай қилганмиз — «Реал»ни ҳам, «Барселона»ни ҳам ютганмиз. Яна кутилмаган натижа кўрсатишимиз мумкин», — дея футболчининг сўзларини клуб расмий сайти келтиради.
«Барча кучимизни берамиз. Бизнинг пайтимиз келади. Бу натижа руҳиятимиз учун жуда катта аҳамиятга эга. Умид қиламанки, буни уддалаймиз», — деди Уильямс.
Учрашувнинг бошланиш ҳуштаги 00:00 да (Тошкент вақти билан) янграйди.