Таиландда Бангкок яқинида кран йўлга қулади: 2 қурбон
Таиландда қурилаётган осма автомагистралдаги навбатдаги бахтсиз ҳодиса икки инсон ҳаётига зомин бўлди. Маҳаллий полиция маълумотларига кўра, 15 январь куни пойтахт Бангкок яқинидаги Самут Сакҳон провинциясида қурилишда ишлаётган кран йўлга қулаган.
Оқибатда йўлда ҳаракатланиб кетаётган икки транспорт воситаси қурилиш конструкцияси остида эзилиб қолган. Ҳодиса натижасида икки киши ҳалок бўлган, яна беш нафар фуқаро турли жароҳатлар билан шифохонага ётқизилгани айтилмоқда.
Мазкур воқеа Таиландда қурилиш хавфсизлиги масаласи яна бир бор кун тартибига чиққанига сабаб бўлди. Чунки бу — кетма-кет икки кун ичидаги иккинчи йирик фожиа: 14 январь куни мамлакатнинг Накҳон Ратчасима провинциясида юқори тезликдаги темирйўл лойиҳасига тегишли кран йўловчи поезд устига қулагани ортидан поезд ҳалокатга учраб, ўнлаб инсонлар ҳалок бўлгани хабар қилинган эди.
Ҳар икки ҳодиса юзасидан текширув ишлари бошлангани маълум қилинмоқда.