Викторинага йомгак ясадык: җиңүчеләр билгеле [+ФОТОЛАР]

Дүшәмбе көнне аңа йомгак ясалды.

Ай саен дөнья күрүче “Кыйбла” сәхифәсен газета укучыларыбыз көтеп ала. Сораштыру вакытында мөселман кардәшләребез сәхифәдә дөнья күргән язмаларның бик тә урынлы, тәрбияви әһәмияткә ия булуын билгеләп үттеләр. Дини викториналар да аларның күңеленә хуш килә икән. 
– Ул безне эзләнергә, байтак кына мәгълүмат тупларга, дини гыйлемнәребезне тагын да тулыландырырга, баетырга ярдәм итә, – диделәр 11 гыйнварда редакциядә кунакта булучылар. 

“Кыйбла” моңа кадәр дә мөхтәсибәт белән берлектә олуг дини бәйрәмнәребезгә багышлап викториналар оештырып килде. Шунысы куанычлы, белем бәйгесендә шәһәрдә яшәүчеләр дә, авыл халкы да, хәтта гаиләләр белән дә катнашалар. Менә бу юлы да мөбарәк Мәүлед бәйрәменә багышлап, Пәйгамбәребез с.г.в. туган айда аның тормышын, сыйфатларын тагын да күбрәк өйрәнү максатыннан “Кыйбла” сәхифәсе игълан иткән “Пәйгамбәребезгә тоташкан гыйлем чишмәсе” викторинасы күпләрнең игътибарын җәлеп иткән. Хәтта Мәмәт, Чупай, Елховой, Габдрахман авылларыннан да килүчеләр булды. Бәйгедә катнашучылар сорауларның җиңел түгеллеген дә искәрттеләр. Әмма шулай булуга да карамастан, һәркем үзенчә тырышкан, тәфсилле җавап язарга омтылган. Иң төгәл җавап Мөһәрирә Гайсинаныкы булып чыкты. Аңа I урын бирелде. Светлана һәм Гүзәл Әпсәләмовалар, Гөлназ Габдрахманова II урынны бүлештеләр. Ә менә III урын сигез кешегә – Сания Таштимерова, Айгөл Әхмәрова, Руза Усманова, Җәмилә Әмирова, Ландыш Сөләйманова, Асия Хәсәнова, Миңнур Саримова, Раушания Харисовага бирелде. Кызыксындыру бүләгенә Клара Гозәерова, Вәсилә Вәлиева, Наилә Хәйретдинова, Алия Сәгыйдуллина, Йосып Хафизов, Берлия Кәримова ия булдылар. 

Безгә, редакция хезмәткәрләренә газета укучыларыбыздан җылы сүзләр ишетү, эшебезне югары бәяләүләре, басмбызны яратып укуларын ишетү бик рәхәт булды. “Әлмәт таңнары” нәшер ителә башлауның беренче көненнән үк янәшәдә булып, 26 ел дәвамында бергә калган, алар янына кушылган укучыларыбызга зур рәхмәтебезне белдерәбез. Газетабызны укып барыгыз, фикерләрегезне белдерегез, хатлар языгыз, бәйге-викториналарда актив катнашыгыз!