Եվրոպայում լարվածություն է առաջացել Թրամփի՝ Գրենլանդիայի շուրջ վեճի ֆոնին ութ երկրների նկատմամբ մաքսատուրքեր սահմանելու որոշումից հետո
Եվրոպական երկրներում մտահոգություն է առաջացրել ԱՄՆ նախագահ Դոնալդ Թրամփի հայտարարությունը, ըստ որի՝ Գրենլանդիայի նկատմամբ ամերիկյան վերահսկողությանը դեմ հանդես եկող ութ պետություններ կկանգնեն 10 տոկոսանոց մաքսատուրքի առաջ։
Ինչպես հաղորդում է Associated Press-ը, Թրամփը հայտարարել է, որ Դանիան, Նորվեգիան, Շվեդիան, Ֆրանսիան, Գերմանիան, Մեծ Բրիտանիան, Նիդեռլանդները և Ֆինլանդիան կներառվեն այդ միջոցառման շրջանակում՝ Գրենլանդիայի կարգավիճակի շուրջ Վաշինգտոնի դիրքորոշմանը հակադրվելու համար։
Թրամփի որոշումը քննադատության ալիք է բարձրացրել եվրոպական մայրաքաղաքներում։ Որոշ պաշտոնյաներ այն բնութագրել են որպես «վտանգավոր էսկալացիայի սկիզբ», իսկ ԵՄ արտաքին քաղաքականության ղեկավար Կայա Կալասը հայտարարել է, որ ԱՄՆ-ի և Եվրոպայի միջև բաժանումը շահեկան է լինելու Չինաստանի և Ռուսաստանի համար։ Նրա խոսքով՝ Գրենլանդիայի անվտանգային հարցերը կարելի է լուծել ՆԱՏՕ-ի շրջանակում, իսկ մաքսատուրքերը կարող են վնասել երկու կողմերի տնտեսություններին։
Մաքսատուրքերի հայտարարությունը հնչել է այն պահին, երբ Գրենլանդիայի մայրաքաղաք Նուուկում հազարավոր մարդիկ բողոքի ցույց էին անցկացնում ԱՄՆ հյուպատոսարանի դիմաց՝ Թրամփի քաղաքականության դեմ։ Միաժամանակ մի շարք եվրոպական երկրներ հայտարարել են, որ իրենց զորքերը գտնվում են Գրենլանդիայում՝ Արկտիկայի անվտանգության վարժանքների շրջանակում։
Թրամփի քայլը քննադատության է արժանացել նաև ԱՄՆ ներսում։ Արիզոնայից սենատոր Մարկ Քելլին նշել է, որ դաշնակից երկրների նկատմամբ մաքսատուրքերի սպառնալիքը կհանգեցնի ամերիկացիների համար ապրանքների թանկացման և կվնասի երկրի միջազգային հեղինակությանը։
Եվրոպական մի շարք երկրներ համատեղ հայտարարությամբ ընդգծել են, որ լիովին աջակցում են Դանիային և Գրենլանդիայի բնակչությանը՝ շեշտելով, որ մաքսատուրքերի սպառնալիքները վտանգում են անդրատլանտյան հարաբերությունները և կարող են հանգեցնել նոր լարվածության։
The post Եվրոպայում լարվածություն է առաջացել Թրամփի՝ Գրենլանդիայի շուրջ վեճի ֆոնին ութ երկրների նկատմամբ մաքսատուրքեր սահմանելու որոշումից հետո first appeared on MediaLab Newsroom-Laboratory.