Арсен Венгер ЖЧ-2026ни 48 жамоага кенгайтиришни келажак деб атади
Жаҳон футболидаги энг катта ўзгаришлардан бири — жаҳон чемпионати иштирокчилари сони 48 та жамоагача кўпайиши масаласи атрофида баҳслар ҳали ҳам тўхтагани йўқ. Бу мавзуга “Арсенал”нинг собиқ бош мураббийи Арсен Венгер ҳам ўз муносабатини билдирди ва кенгайиш ғояси ортида турган асосий маънони тушунтириб берди.
Венгернинг таъкидлашича, миллий терма жамоа учун майдонга тушиш — оддий ўйин эмас, бу ўзгача ҳис. Бир тарафдан футболчи ўз мамлакати шарафи ва ғурурини ифода этади, иккинчи тарафдан эса улкан босим остида қолади: мағлубиятдан қўрқиш, мухлисларни ранжитиш хавфи, кутилган даражада ўйнай олмаслик эҳтимоли ҳар қадамда сезилиб туради.
Унинг фикрича, бутун миллат олдида жавобгарликни ўз зиммасига олиш учун жуда катта руҳий қувват керак бўлади. Шунинг учун ҳам кучли терма жамоаларга нафақат техник ва жисмоний жиҳатдан тайёр, балки босимга чидамли, янги авлод руҳини ифода эта оладиган футболчилар зарур.
Венгер жаҳон чемпионати узоқ йиллар давомида асосан Европа ва Жанубий Америка марказида айланиб келган мусобақа бўлганини эслади. Энди эса футбол ҳақиқатан глобал спортга айланди: қаерга борманг, одамлар футбол ҳақида гапиради, баҳслашади, орзу қилади. Шу нуқтаи назардан, турнирни кўпроқ мамлакатлар учун очиш, айниқса Африка ва Осиё жамоаларига имкониятларни кенгайтириш — табиий қадам.
Венгер келажакка қараб фикр юритар экан, ҳатто юз йилдан кейин ҳам ҳар бир инсонда ҳеч бўлмаганда жаҳон чемпионатини ютишни орзу қилиш имкони бўлиши кераклигини айтди. Унга кўра, 32 жамоадан 48 жамоага ўтиш ана шу йўлдаги муҳим ва мантиқий қадамдир.
Мутахассис жаҳон чемпионатининг энг ёқимли ва таъсирли қисми сифатида турнирнинг илк икки ҳафтасини алоҳида тилга олди. Чунки айнан шу пайтда бутун дунё бир нуқтага жамланади: ҳар ким ўз мамлакати номидан фахрланади, бир вақтнинг ўзида умумий бирлик, умумий байрам руҳи пайдо бўлади. Венгер бу ҳолатни “жамоавий байрам” деб атади.
Бироқ иштирокчилар кўпайиши билан турнирнинг умумий ҳажми ҳам ошиб боради. Венгер таъкидлаганидек, 104 та ўйиндан иборат ва анча узоқ давом этадиган жаҳон чемпионати руҳий жиҳатдан катта синов бўлади. Бу ерда ғалабага етишиш учун фақат тактика ёки маҳорат эмас, балки жиддий психологик тайёргарлик ҳам талаб этилади.
Унингча, мураббийлар штаби жамоанинг бирлигини, ички муҳитини ва мотивациясини бир неча ҳафта давомида бир маромда ушлаб туриши керак бўлади. Айниқса плей-офф босқичларида пенальтилар қарийб муқаррар ҳолатга айланади, бундай пайтда эса руҳий омил ҳал қилувчи аҳамият касб этади.
Арсен Венгер ушбу фикрларни Давосда ўтган Жаҳон иқтисодий форумида билдириб, жаҳон чемпионатини кенгайтириш қарорини фақат рақамлар эмас, балки футболнинг глобал келажаги нуқтаи назаридан ҳам кўриш лозимлигини уқтирди.