Хайкин «Ман Сити» устидан ғалабани тарихий воқеа деб атади
Норвегиянинг «Будё-Глимт» клуби дарвозабони Никита Хайкин «Манчестер Сити» устидан қўлга киритилган сенсацион ғалабадан кейин ўз фикрлари билан ўртоқлашди. Бу ҳақда euro-football.ru хабар беради.
Европа Чемпионлар лигаси умумий босқичининг 7-тур учрашувида норвегияликлар инглиз грандини 3:1 ҳисобида мағлуб этди.
«Ўйиндан кейин ҳам биз нима иш қилганимизни дарров англаб етмадик. Футбол индустриясида XXI асрнинг энг кучли тизимларидан бирини ютдик, десак бўлади. Бу учрашув нафақат биз учун, балки норвегияликлар ва умуман Норвегия спорти тарихига кирди», — деди Хайкин «VideoSports» дастурида.
Дарвозабон бу натижа унинг фаолиятидаги энг муҳим ғалабалардан бири эканини ҳам таъкидлади.
Ҳозирда «Будё-Глимт» Чемпионлар лигаси турнир жадвалида 6 очко билан 28-ўринда бормоқда.