Линкольн Моуриньони танқид қилди: у ваъдасида турмади

«Фенербахче»нинг собиқ футболчиси Линкольн Жозе Моуриньо билан боғлиқ норозилигини очиқ билдирди. Португалиялик мутахассис Истанбул клубини 2024–2025 йилларда бошқарган. Бу ҳақда euro-football.ru хабар беради.

Линкольннинг айтишича, Моуриньо унга берган ваъдасини бажармаган ва футболчига ҳурматсизлик қилган. «У жуда кўп ютуқларга эришган, буну ҳеч ким инкор этмайди. Лекин мен учун ҳаётда характер совринлардан муҳимроқ», — деди футболчи Fanatik нашрига берган интервьюсида.

Унинг сўзларига кўра, «Ҳалл Сити»га ижарага кетишидан аввал Моуриньо билан гаплашган ва мураббий уни ёзги йиғинга Португалияда кўришни исташини билдирган. Мавсум тугагач, Линкольн йиғинга чақирув кутган, бироқ мураббий билан боғланишга уринганда, Жозе у билан гаплашишдан бош тортиб, спорт директорига мурожаат қилишни айтган.

Линкольннинг таъкидлашича, жамоа Португалияда бўлган пайтда у ҳам Португалияда уйида эди, шунга қарамай, Моуриньо уни Истанбулга қайтариб юборган ва алоҳида машғулот ўтказишни буюрган. «Менга нисбатан адолатсиз ва ҳурматсиз муносабат бўлди», — дея қўшимча қилди у.

Шунингдек, футболчи кўплаб ўйинларда ҳатто ўз позициясида ўйнамаган бўлса ҳам клубга ёрдам бериш учун бор кучини берганини, оғир жароҳатдан кейин эса қўллаб-қувватлаш кутгани, аммо уни олмаганини айтди. «Бошқалар каби машҳур эмасман, лекин ҳар доим майдонда охиригача курашганман», — деди Линкольн.

Ҳозирда Жозе Моуриньо «Бенфика»ни бошқармоқда.