Энрике ПСЖ Осерга қарши ўйинда кўпроқ натижага лойиқ эди
ПСЖ бош мураббийи Луис Энрике Лига 1нинг 19-турида Осерга қарши баҳсда жамоаси 1:0 ҳисобидан каттароқ устунликни кўрсатишга арзигулик ўйнаганини таъкидлади. Бу ҳақда euro-football.ru хабар беради.
Парижликлар сафарда минимал ғалабани қўлга киритди. Учрашувдаги ягона гол муаллифи Брэдли Баркола бўлди.
«Ҳисоб бор-йўғи 1:0, лекин менимча, биз кўпроқ нарсага лойиқ эдик. Ҳар бир ўйинда ғалаба қозониш қанчалик қийинлигини яхши биламиз», — деди Энрике клуб матбуот хизматига.
Мутахассис сафарда ўйнаш доим мушкул бўлишини ҳам қайд этди. Унинг сўзларига кўра, парижликлар учун муҳим вазифа турнир жадвалидаги рақиблардан бири бўлган Лансга босимни ушлаб туриш эди.
Ғалабадан сўнг ПСЖ вақтинча турнир жадвалида пешқадамликни қўлга олди, бироқ агар Ланс сафарда Марселни мағлуб этса, парижликлар яна биринчи ўринни бой бериши мумкин.