Самарқанд ёш сунъий интеллект ишлаб чиқувчилари учун майдонга айланди
Самарқандда 23 январ куни Milliy AI Hackathon’нинг ҳудудий босқичи якунланди. Уч кун давом этган интенсив иш ва муҳокамалар натижасида пойтахтда ўтадиган республика босқичида вилоят номидан иштирок этадиган жамоалар саралаб олинди. Бу ҳақда podrobno.uz хабар беради.
400 дан ортиқ иштирокчини бирлаштирган тадбир оддий мусобақа доирасидан чиқиб, долзарб ижтимоий муаммолар учун ечим изланадиган платформага айланди. Хакатонда 47 та жамоа тиббиёт, таълим, тадбиркорлик, киберхавфсизлик ҳамда тақиқланган моддалар айланишини назорат қилиш йўналишларида сунъий интеллект асосидаги лойиҳалар устида ишлади.
Иштирокчилар ижтимоий тармоқларда гиёҳвандлик ва психотроп моддалар бўйича ноқонуний рекламани аниқлаш, касалликларни ташхислаш ва тиббиёт муассасалари жараёнларини автоматлаштириш, таълим ва менторлик платформалари, шунингдек рақамли маконни киберхатарлар ҳамда зарарли контентдан ҳимоялашга қаратилган ишланмаларни тақдим этди.
Ички ишлар вазирлиги эксперти Шукрулло Ҳафизов онлайн маконда кибербуллинг ва ҳақоратомуз изоҳларни автоматик аниқлаб, блоклаш тизимини юқори баҳолади. Менторлар эътиборини мактаб ўқувчиларда soft skills кўникмаларини ривожлантириш ва ўқув марказлари ишини самарали ташкил этишга қаратилган ташаббуслар ҳам тортди.
Оралиқ саралашдан сўнг хакатон финалига 23 та лойиҳа чиқди. 23 январ куни ўтган ҳудудий финал якунларига кўра беш йўналиш бўйича ғолиблар аниқланди: таълимда — AI-club жамоаси (абитуриентларга ОТМга киришга тайёргарлик кўришда ёрдам берувчи AI-ментор лойиҳаси), тадбиркорликда — Ёш дастурчи жамоаси (бизнес учун давлат имтиёзлари ва қўллаб-қувватлаш чораларини топишга кўмаклашувчи AI-платформа), тиббиётда — 21 жамоаси (хусусий клиникалар учун онлайн рўйхатдан ўтказиш, дастлабки диагностика ва бемор ҳолатини AI орқали динамик таҳлил қилиш ечими), киберхавфсизликда — Unit coders жамоаси (файл ва хабарларни офлайн режимида таҳлил қилиб, киберхатарларни олдиндан аниқловчи тизим), тақиқланган моддалар айланишини назорат қилишда — Cyber team жамоаси (ижтимоий тармоқларда ноқонуний айланма, кибержиноятчилик ва хавфли контентни эрта аниқлашга қаратилган лойиҳа).
Ташаббус Рақамли технологиялар вазирлиги, Соғлиқни сақлаш вазирлиги, Ички ишлар вазирлиги, Олий таълим, фан ва инновациялар вазирлиги, Ёшлар ишлари агентлиги, шунингдек IT Park Uzbekistan, AICA, ML Community ва Uzinfocom ҳамкорлигида амалга оширилмоқда. Хакатоннинг бош ҳомийси ва ҳамкори сифатида Uzum миллий рақамли экотизими ҳамда мамлакатдаги бошқа IT-компаниялар қатнашди.
Тақдим этилган истиқболли ишланмалар келгусида венчур фондлар томонидан молиялаштирилиши мумкин. Бу эса ёш дастурчилар ғояларининг тақдимот даражасида қолиб кетмасдан, Ўзбекистон рақамли иқтисодиёти ривожига амалий ҳисса қўшишига йўл очади.
Milliy AI Hackathon’нинг биринчи босқичи 2025 йил октябрида старт олган бўлиб, 2026 йил якунигача республиканинг барча ҳудудларида ўтказилиши режалаштирилган. Якуний финал 2026 йил декабрида Тошкентда бўлиб ўтади. Самарқанд босқичи ортда қолди, навбат — республика босқичида.