Генич Чемпионлар лигаси 7-турида икки клубни ажратиб кўрсатди

Машҳур шарҳловчи Константин Генич Европа Чемпионлар лигаси умумий босқичидаги навбатдаги тур якунлари ҳақида фикр билдирди. Унинг таъкидлашича, норвегиялик «Будё-Глимт» турнирнинг энг кутилмаган жамоаларидан бирига айланмоқда. Бу ҳақда euro-football.ru хабар беради.

Сўнгги ўйинда скандинавлар сенсацион тарзда «Манчестер Сити»ни 3:1 ҳисобида мағлуб этди. Генич «Будё-Глимт»ни 7-турдаги асосий сенсация деб атар экан, яна бир ёқимли кутилмаган ҳолат сифатида «Арсенал»нинг ўйинини ҳам алоҳида қайд этди.

«Будё-Глимт» — 7-турдаги энг катта сенсация. Менимча, «Арсенал»нинг чиқиши ҳам сенсация бўлди. «Арсенал» бунчалик очиқ ва дадил ўйнашини кутмагандим. Улар «Интер»га қарши жуда зўр ҳаракат қилди», — дея Геничнинг сўзларини «Komment.Shоу» YouTube канали келтирди.

Етти турдан сўнг «Арсенал» 21 очко жамғарган ва Чемпионлар лигаси умумий раунди жадвалида пешқадамлик қилмоқда. «Будё-Глимт» эса 6 очко билан 28-ўринда бормоқда.