Роналду 2027 йилда футболдан кетиши мумкин, Голливуд чақиряпти
Криштиану Роналду келажагини гўё бўлаклаб сотаётгандек: ҳар мавсум янги гап-сўз, лекин “якун” деган сўзга ҳеч ким ишонгиси келмайди. Журналист Бен Жейкобс берган маълумотларга кўра, португалиялик юлдуз 2027 йилда “Ал-Наср”ни тарк этиши мумкин. Бу ҳақда euro-football.ru хабар беради.
Бир факт ўзгармайди: Роналду 40 ёшда.
У фаолияти давомида 960 та гол урди ва 1000 лик маррага етишни қатъий мақсад қилган. Саудия Арабистонидаги шартномаси 2027 йилгача, “Ал-Наср” сафида эса 125 ўйинда 110 гол муаллифи бўлган.
Бу рақамлар нафақага чиқишга шошилмаётган футболчининг ҳисоботини эслатади. Роналду оиласи тўхташни маслаҳат беришини яширмайди, аммо ўзи ҳамон клубига ва терма жамоага фойдаси тегаётганини айтади. У танасига бўлган ёндашувни деярли профессионал стандартга айлантирган: мушаклар — капитал, рекордлар эса — валюта.
Роналду A Bola нашрига берган фикрида ҳам худди шу кайфиятни такрорлаган:
“Ўйлашимча, мен ҳали ҳам яхшиман, клубим ва терма жамоамга ёрдам беряпман, унда нега давом этмаслигим керак?”
Шу билан бирга, футбол олами унга бошқа йўлни ҳам “мулойимлик билан” кўрсатмоқда. “Манчестер Юнайтед”, “Ньюкасл”, “Вильярреал” ва “Фиорентина”да ўйнаган Жузеппе Росси Goal.com билан суҳбатда Роналдуни Голливудга чорлаб, ҳатто Джокер каби салбий қаҳрамон ролини ҳам тилга олди. Франция терма жамоаси, “Арсенал” ва “Барселона” собиқ ярим ҳимоячиси Эммануэль Пети эса Hochgepokertда бу ғояни “Оскар” даражасигача олиб чиқди.
Бу гаплар бежиз эмас: Роналду аллақачон шахсий бренд, бутун бир франшизага айланган. Унинг жарима майдонидан Warner Bros павильонига ўтиши, “Ал-Наср”дан шунчаки “Бенфика”га қайтишидан ҳам мантиқийроқ туюлиши мумкин. Камера уни зарба каби “севади” — шу маънода “янги Джокер” ғояси ҳам оддий кастинг қарорига ўхшайди. Ахир томошабин билан пауза қилиб ўйнашни, кейин эса “Сиу” билан портлашни у-дек ким эплай олади?
Асосий зиддият эса кинода ҳам, “Ал-Наср” уни ушлаб қолиш учун улушини 15 фоизгача ошириб бериши мумкинлиги ҳақидаги миш-мишларда ҳам эмас. Энг катта савол — Роналду футболдан кейин ҳам ўзига бўлган қизиқишни қандай сақлаб қолади. Унинг атрофидагилар эътибор пасайиб кетмаслиги устида аллақачон бош қотираётгани аниқ.
Яна бир детал ҳам бор: Мадейрада Роналду ҳайкалига ўт қўйишга уриниш бўлди, полиция вандални қўлга олди. Роналду эса навбатдаги голидан кейин “Ишонишда давом этамиз, курашишда давом этамиз” дея ёзди. Тасвир ғалати: бир “фильм”да у 960-голини ураяпти, иккинчисида эса унинг бронза тимсолини кулга айлантиришмоқчи. Ҳар икки сюжет битта мавзуга бориб тақалади — улканликка нисбатан нафрат ва абадийликдан чўчиш.
Роналду кетиши нимани англатади? Агар бу сокин “раҳмат” билан якунланса, бу мутлақо португалияликка хос эмас. Аксинча, стадионлар бўйлаб олқишларга тўла тур, фильм, реклама ва 1000 гол учун навбатдаги катта ҳисоб — кўпроқ ҳақиқатга яқин. Чунки у доим майдонда гўё трибуналарда оддий мухлислар эмас, ҳакамлар ҳайъати ўтиргандек ўйнаган.
Энг баҳсли хулоса шуки, Роналду фаолиятини якунлашдан эмас, янгилик марказидан чиқиб қолишдан чўчийди. У ахборот сабабини ҳамма нарсадан ясай олади: Пирс Морган билан интервьюдан тортиб, “Бетмен” оламидаги тахминий Джокер ролига қадар.
Роналду “қолган оз сонли йилларимдан завқ олмоқчиман” дея таъкидлар экан, дунё бу йиллар аслида нечта эканини муҳокама қилишда давом этади. Португалиялик эса ўзи энг яхши биладиган ишни қилади: ҳар бир қадамини воқеага, ҳар бир голини далилга, ҳар бир “тез орада”ни эса чекcизликка айлантиради. Унинг оламида хайрлашув ҳам рекорд бўлиши шарт.
Арман Тигранянц