Виктор Фонт президент бўлса, Месси билан ярашишни ваъда қилди

Виктор Фонт март ойида бўлиб ўтадиган «Барселона» президентлиги сайловида ғалаба қозонишига умид қилмоқда. Унинг асосий вазифаларидан бири клубнинг Лионел Месси билан совуқлашиб кетган муносабатларини қайта тиклаш бўлиши айтилаяпти. Бу ҳақда euro-football.ru хабар беради.

Маълумки, каталонияликлар 2021 йилда молиявий муаммолар сабаб Месси билан шартномани узайтира олмаганди. Хайрлашув матбуот анжуманида Лео кўз ёшларини тийолмаган. ОАВда аргентиналик юлдузнинг Жоан Лапорта билан муносабатлари ҳам яхши эмаслиги ҳақида хабарлар тарқалган. Шунга қарамай, Месси кузда «Камп Ноу»дан сурат жойлаган, клуб эса унинг стадионга қандай кириб олганини билмаслигини билдирган.

«Леонинг “Камп Ноу”га деярли яширинча киришга мажбур бўлаётгани, Мессини йўқотиб, аммо “Реал” билан алоқаларни узмаганимиз — буни кечириш мумкин эмас», — деди Фонт El Larguero дастурида.

Фонтнинг таъкидлашича, «Барселона» учун энг муҳим йўналишлардан бири — Месси билан ярашиш. Агар сайловда ютса, у Мессига «уч таянчли» таклиф беришни режалаштирмоқда: институционал, тижорий ва спорт йўналишларида.

Айни пайтда Лионел Месси MLSдаги «Интер Майами» сафида тўп сурмоқда.

Шунингдек, Фонт сайловда ғалаба қозонган тақдирда клубда кимлар билан хайрлашиши мумкинлиги ҳақида ҳам гапирди.