АҚШда хоккей ўйинида отишма сабабли уч киши ҳалок бўлди
16 февраль куни Род-Айленд штатидаги Потакет шаҳрида мактаб жамоалари иштирокидаги хоккей мусобақаси вақтида отишма содир бўлди. Полиция маълумотига кўра, ҳодиса оқибатида 3 киши ҳалок бўлган, яна 3 нафар фуқаро оғир аҳволда шифохонага ётқизилган.
Терговнинг дастлабки хулосаларига кўра, ҳодиса “мақсадли” бўлиб, оилавий келишмовчилик билан боғлиқ бўлиши мумкин. Полиция гумонланувчи сифатида 56 ёшли Роберт Дорганни тилга олган, у мусобақада иштирок этган ўқувчилардан бирининг отаси экани айтилган. Хабарларга кўра, гумонланувчи ўз жонига қасд қилган, қурбонлар орасида ҳам у бор.
Гувоҳлар ҳужум пайтида қуролланган бошқа бир киши ҳужумчини тўхтатишга уринганини айтишган, воқеа жойидаги қуроллар мусодара қилинган. Айни пайтда полиция гувоҳларни сўроқ қилмоқда, видеоёзувлар ўрганилмоқда ва ҳодисанинг барча тафсилотлари аниқланмоқда.