Казанда махсус хәрби операция геройларына багышланган интерактив күргәзмә ачылды

Бүген Казанда махсус хәрби операция геройларына багышланган «Белем. Геройлар» дип атлган күргәзмә ачылды. Ачылыш тантанасы «Россия – минем тарихым» тарихи паркында узды. Тантаналы чарага хөрмәтле кунаклар сыйфатында ТР мәгариф һәм фән министры урынбасары Алсу Әсәдуллина, махсус хәрби операция ветераны, лейтенант, авария-коткару берләшмәсе командиры Кирилл Дмитриев, РФ Милли гвардиясе гаскәрләре федераль хезмәтенең ТР буенча идарәсе башлыгының хәрби-сәяси эш буенча урынбасары Рафил Нәбиуллин, Казан танк училищесы башлыгының хәрби-сәяси эш буенча урынбасары Вячеслав Епифанцев һәм башкалар чакырылган иде.

«Вакыйганың әһәмияте - бүген ачыла торган күргәзмәнең интерактив булуында. Теләгән һәркем мөһим мәгълүмат белән уңайлы, гади һәм кызыклы ысул белән таныша алачак. Балалар, бирегә әти-әниләрегезне дә алып килегез, аларга да күргәзмәне күрсәтегез, чөнки һәркем безнең хәрбиләрнең батырлыгы белән горурланырга тиеш», - дип сөйләде авария-коткару берләшмәсе командиры Кирилл Дмитриев.

Фото: © «Татар-информ», Кирилл Гомәров

Экспозиция махсус хәрби операция геройларына багышланган график новеллалар белән тәкъдим ителгән. Бирегә килүчеләр комикс рәвешендә теге яки бу геройның батырлыгы белән таныша ала. «Белем» җәмгыятенең Татарстан Республикасындагы төбәк бүлеге директоры Алексей Зиновьев сөйләгәнчә, бу - махсус эшләнгән, чөнки күргәзмәнең максатчан аудиториясе – балалар һәм яшүсмерләр.

«Бу - безнең геройлар турында интерактив хикәя. Алга таба күргәзмә бөтен Россия буйлап юл тотачак. Киләчәктә без буклетларны визуаль новеллалар рәвешендә чыгара башлаячакбыз», - диде Алексей Зиновьев.