Тошкентда контрабанда 179 та iPhone савдоси фош этилди
Тошкент шаҳрида iPhone мобил қурилмаларининг ноқонуний айланмасига боғлиқ навбатдаги ҳолатлар фош этилди. Toshkent-AERO ихтисослаштирилган божхона комплекси матбуот хизматига кўра, тезкор текширувлар давомида жами 179 дона телефоннинг “қора бозор” орқали сотилишига чек қўйилган.
Маълум қилинишича, Контрабандага қарши кураш бўлими ходимлари Чилонзор туманида божхона расмийлаштирувидан ўтмаган, ноқонуний йўллар билан олиб кирилган 255 миллион сўмлик 102 дона iPhone “шартли харидор”га сотилаётган вақтда тўхтатиб қолган.
Шунингдек, Шайхонтоҳур тумани яқинидаги савдо мажмуаси атрофида 207 миллион 900 минг сўмлик 77 дона телефон ҳам “шартли харидор”га таклиф қилинаётган пайтда аниқланиб, сотувга чиқарилиши олди олинган.
Айни пайтда мазкур ҳолатлар бўйича божхона органлари томонидан суриштирув ишлари олиб борилаётгани маълум қилинди.
Хабарда қайд этилишича, 2026 йил бошидан буён мазкур комплекс божхоначилари 35 та ҳолатда жами 1 миллиард 727 миллион сўмлик 377 дона уяли алоқа воситаларининг ноқонуний айланмасини бартараф этган.