Тошкент ҳавоси ифлосланишининг асосий сабаби маълум қилинди
Ўзгидромет Тошкент шаҳрида ҳаво сифатининг кескин ёмонлашиши сабабларини очиқлади, деб uznews.uz хабар берди. Жорий йилнинг 1 март куни пойтахт ҳаво ифлосланиши бўйича дунё рейтингида яна етакчи ўринга чиқди. Мутахассисларнинг таъкидлашича, бу ҳолат минтақага кириб келган совуқ ҳаво оқими ва кундузи ҳамда кечаси ўртасидаги ҳароратнинг кескин фарқи (кечаси +3...+5, кундузи +11...+15 даража) билан боғлиқ.
Бундай метеорологик шароит ер юзасига яқин қатламларда ҳаво алмашинувини секинлаштириб, ҳаво ифлослантирувчи моддаларнинг тарқалишига тўсқинлик қилган. Натижада атмосферада PM2.5 ва PM10 майда заррачаларининг концентрацияси ортиб кетган. Бироқ синоптиклар эртага кутилаётган ёғингарчилик ҳаво сифатининг яхшиланишига хизмат қилишини прогноз қилмоқдалар.