Хавфсизлик сабабли Пугачева Кипрдан кўчиб кетмоқда
Машҳур хонанда Алла Пугачева Кипрдаги ўзига тегишли бўлган ҳашаматли қасрни сотиб, бошқа хавфсизроқ ҳудудга кўчиб ўтишни режалаштирмоқда. Бу қарорга Яқин Шарқдаги нотинч вазият ва хонанданинг уйи жойлашган ҳудуднинг Британия ҳарбий базаларига яқинлиги сабаб бўлган. Маълумки, мазкур базалар Эрон дронлари ҳужумига учраш хавфи остида қолмоқда. Бу ҳақда риелтор Марк Гершкович ўз кузатувлари билан ўртоқлашди.
Мутахассиснинг сўзларига кўра, Лимасол шаҳрининг энг нуфузли қисмида жойлашган бу кўчмас мулкни 4 миллион евродан 6 миллион еврогача бўлган нархда сотиш имконияти мавжуд. Қизиғи шундаки, минтақадаги сиёсий кескинлик Кипрдаги уй жой нархларига салбий таъсир кўрсатмаган. Аксинча, қўшни давлатлардан келаётган бадавлат инсонлар оқими туфайли кўчмас мулк қиймати янада ошиши мумкин.
Эслатиб ўтамиз, Алла Пугачева ва унинг турмуш ўртоғи Максим Галкин 2019 йилда Кипрда уч қаватли, умумий майдони 600 квадрат метрга тенг бўлган қаср қурилишини бошлаган эди. Ўша вақтда лойиҳанинг қиймати 2,5 миллион евродан ошган. Денгиз бўйида жойлашган ушбу уй ўзининг панорамали деразалари ва шинам террасалари билан ажралиб туради. Ҳозирги кунда хонанда оиласи билан бирга хавфсизроқ манзил излашга мажбур бўлмоқда.