Шәхси мунчада шартлау булган: бала зыян күргән
Минзәлә районы Хуҗамәт авылындагы гадәттән тыш хәл турында "112" хезмәте аша җирле коткаручыларның кизү бүлегенә кичә, 17 гыйнварда, 11:25 сәгатьтә хәбәр ителә.
Алынган хәбәр буенча шәхси йортта газ котелы шартлау һәм бер баланың сәламәтлегенә зыян килүе әйтелә. Коткару хезмәте йортка терәп салынган мунчада мичтәге парның чамадан тыш күп җыелуы аркасында торба шартлавын ачыклый. Шул вакытта мунча яныннан узып баручы йорт хуҗаларының 2011 елгы оныгы зыян күргән. Аны Чаллыдагы хастаханәгә озатканнар.
Шартлау аркасында мунчаның дивары һәм түшәме җимерелгән, йортка зыян килмәгән.
Чыганак:http://intertat.ru/