Кырын эш барыбер беленә
Агымдагы елның 17 гыйнварында эчке эшләр бүлегенең дежур частенә иртән Яңа шәһәр боҗрасы янәшәсендәге “Камилла” кибете тирәсендә бер хатын-кызга һөҗүм итеп, әйберләрен урларга теләүләре турында хәбәр алына. Оператив төркем урынга чыгып тикшерү эшләре алып бара башлагач, әлеге хатын-кызның эшкә соңга калган өчен дисциплинар җаваплылыктан качып, ялганлавы билгеле була.
Баксаң, әлеге хатын-кыз эшкә соңарган. Хезмәт урыныннан аның кайдалыгын белешеп эзли башлагач, ул хезмәттәшләренә дә, әтисенә дә үзенә һөҗүм итүләрен, арттан килеп башына сугып әйберләрен урларга теләүләрен әйтә, ә әтисе бу хакта полиция бүлегенә шалтыра. Соңыннан хатын-кыз моны эш урыныннан кумасыннар өчен генә уйлап чыгаруын әйтә.
- Аңа әлеге гамәле өчен РФ Административ хокук бозулар кодексының 19.13 маддәсе буенча җавап бирергә туры киләчәк. Ә бу - 1500дән 2000 сумга кадәр штраф дигән сүз. Бу хатын-кыз шулай итеп үзен дә уңайсыз хәлгә калдырды, полиция хезмәткәрләрен дә юк эш белән шөгыльләнергә мәҗбүр итте, - ди район эчке эшләр бүлегенең тикшерү бүлекчәсе юстиция майоры Рөстәм Хафизов.