Футболдан Қазақстан жасөспірімдер құрамасы Қырғызстанды ойсырата жеңді

16 жасқа дейінгі Қазақстан жасөспірімдер құрамасы жолдастық кездесуде Қырғызстан құрамасын 5:0 есебімен ойсырата жеңді, деп хабарлайды Tengri Sport.
Ойын жасөспірімдер командасының кезекті жиыны аясында Шымкентте өтті.
Бірінші таймнан кейін есеп ашылмағанымен, екінші кезеңнің басынан бастап қазақстандықтар қарсыластарына қысым көрсете бастады.
52-минутта Бекнұр Нұрман қапталдан асырылған допты басымен қақпаға бағыттап, есеп ашты. 72-минутта Максим Бонет команданың жылдам шабуылын жақын қашықтықтан жасалған соққымен түйіндесе, 77-минутта Никита Духов тағы бір голды басымен соғып, есепті ірі нәтижеге жеткізді.
84-минутта Ерасыл Ибадулла қарсыластың қателігін сәтті пайдаланып, қақпашымен жеке шығып, мүмкіндігін мүлт жібермеді.
Ал 88-минутта қарсылас қақпасына пенальти белгіленіп, оны Әлихан Қуандық сенімді орындады.
Матч 5:0 есебімен Қазақстан құрамасының пайдасына аяқталды.
Айта кетейік, 5 маусымда командалар Шымкентте өзара алғашқы ойынын өткізіп, ол да Қазақстан құрамасының жеңісімен (1:0) аяқталған болатын.

Бұған дейін 19 жасқа дейінгі Қазақстан құрамасы Сербия командасын 3:1 есебімен жеңіп, Еуропа чемпионатының іріктеу тобында көш бастаған еді.
Ал Қазақстан футбол федерациясы (ҚФФ) мәлімдеме жасап, ұлттық құраманың бас жаттықтырушысы Талғат Байсуфиновқа қатысты пікір білдірді.