Күн жүйесінің шетінде орналасқан New Horizons бір жылдық “ұйқыдан“ кейін оянды
New Horizons ғарыш аппараты шамамен бір жылға созылған гибернация режимінен шықты, деп хабарлайды Tengrinews.kz тілшісі NASA-ға сілтеме жасап.
Бұл миссия тарихындағы ең ұзақ "ұйқы" кезеңі болды. 23 маусымда Зонд Жерден шамамен 9,5 миллиард шақырым қашықтықта болған кезде оның жоспарлы түрде оянғаны туралы хабарланды.
"New Horizons жұмыс жағдайына қайта оралды және Плутонның шегінен тысқары жатқан алыс Койпер белдеуінде жиналған ғылыми деректерді тарата бастауға дайын", - делінген жарияланымда.
Ояну туралы сигнал Жерге 8 сағат 52 минутта жетті. Оны Мадрид маңындағы Deep Space Network станциясы қабылдап алды.
New Horizons үшін гибернация режимі - бұл аппарат пен оның аспаптарын "өшіру" емес, ұзақ ұшуға арналған арнайы ресурс үнемдеу режимі.
Бұл кезеңде команда әдетте жаңа сұраулар жібермейді және ғылыми деректерді толық көлемде қабылдамайды, бірақ борттық жүйелер жағдайды автономды бақылауды және ақпарат жинауды жалғастыра береді.
Атап айтқанда, аппарат апта сайын барлық негізгі параметрлердің қалыпты екенін білдіретін қызметтік сигнал беріп тұрды. Сондай-ақ бортта деректерді тәулік бойы жазу жалғасты: плазмалық аспаптар орта параметрлерін өлшесе, арнайы есептегіш планетааралық кеңістіктегі шаң бөлшектерін тіркеп отырды.
New Horizons 2006 жылғы 19 қаңтарда іске қосылды, оның салмағы шамамен 478 келі. 2007 жылы аппарат Юпитер маңында гравитациялық маневр жасады, 2015 жылғы 14 шілдеде тарихта алғаш рет Плутон жүйесін жақын қашықтықтан зерттеді, ал 2019 жылғы 1 қаңтарда Койпер белдеуіндегі Аррокот нысанының жанынан ұшып өтті. 2024 жылғы қазанда New Horizons Күннен 60 астрономиялық бірлікке алыстады.