Депутаттар Ұлытау және Атырау облыстарының жаңа әкімдерін тағайындау үшін жиналады
17 шілдеде Атырау және Ұлытау облыстарының жаңа әкімдерін тағайындауға келісім беру бойынша мәслихат депутаттарының жиналысы өтеді, - деп хабарлайды Tengrinews.kz.
Тиісті ақпарат Атырау және Ұлытау облыстары мәслихаттарының сайттарында жарияланды.
Мәслихаттар мәліметінше, Атырау облысының аумағындағы депутаттардың отырысы 17 шілдеде сағат 9:30-да Атырау қаласында өтеді. Қатысушыларды тіркеу сағат 8:00-де басталады.
Ұлытау облысында облыстық, қалалық және аудандық мәслихат депутаттарының жиналысы сағат 11:00-де Жезқазған қаласында өтеді. Тіркеу 17 шілдеде сағат 10:00-де басталады.
Іс-шаралар Қазақстан Президентінің 2022 жылғы 8 маусымдағы Жарлығымен бекітілген Мәслихат депутаттарының облыс әкімдерін тағайындауға келісім беру қағидаларына сәйкес өткізіледі.
Облыс әкімі лауазымына үміткерлердің есімдері әзірге хабарланған жоқ.