Қазақстанда вейптер заңсыз сатылғаны белгілі болды
Қазақстанда электрондық тұтыну жүйелерінің айналымына тыйым салынғанына қарамастан, кей тұлғалар вейптерді заңсыз әкелуді және сатуды жалғастырып, миллиардтаған қылмыстық табыс тауып отыр. Бұл туралы Қаржылық мониторинг агенттігі мәлімдеді, деп хабарлайды Tengrinews.kz.
Жыл басынан бері 276 мыңнан астам вейп тәркіленді
Жыл басынан бері ҚМА вейптерді заңсыз сатудың 25 фактісінің жолын кесті. Қазіргі уақытта 37 қылмыстық іс тергеліп жатыр.
Заңсыз айналымнан 276 мыңнан астам электрондық тұтыну жүйесі тәркіленді. Тағы 18 адамға қатысты 14 қылмыстық іс сотқа жолданды.
Шоттар арқылы 3,2 миллиард теңгеден астам қаражат өткен
Астанада вейптердің заңсыз айналымын ұйымдастырған қылмыстық топтың қызметі тергеліп жатыр. Өнімдерді сақтау үшін жалдамалы қоймалар мен кеңселер пайдаланылған. Сауда интернет-дүкендер, сондай-ақ Telegram, WhatsApp және Zangi мессенджерлері арқылы жүзеге асырылған.
"Құпиялылықты сақтау мақсатында жеке кәсіпкердің банктік шоттары пайдаланылған, ал сатып алушыларға тұрмыстық техника алдық деп айту ұсынылған. Шоттар арқылы өткен ақша көлемі 3,2 миллиард теңгеден асты", - деп хабарлады ҚМА.
Қарағанды облысында 340 миллион теңгенің вейптері тәркіленді
Қарағанды облысында Telegram-да вейп сататын интернет-дүкен ұйымдастырушылары 2 жыл 6 айға бас бостандығын шектеу жазасына кесілді. ҚМА мәліметінше, олар төрт қойманы, интернет-дүкен операторларын және курьерлерді пайдалана отырып, заңсыз схема құрған.
Тінту кезінде құны 340 миллион теңге болатын 30 мыңға жуық электрондық тұтыну жүйесі тәркіленді.
Ұлытау облысында екі сатушы сотталды
Ұлытау облысында дропперлік схеманы пайдаланып, вейптерді заңсыз сатуды ұйымдастырған екі жергілікті тұрғынға қатысты айыптау үкімі шықты. Ақшаны алу және аудару үшін олар курьердің атына ашылған банктік шотты пайдаланған.
Сот олардың әрқайсысына қылмыстық табыстарын тәркілей отырып, төрт жылға бас бостандығын шектеу жазасын тағайындады.
ҚМА электрондық тұтыну жүйелерін заңсыз әкелу, сақтау, тасымалдау және өткізу, сондай-ақ мұндай қызметтен түскен кірістерді заңдастыру қылмыстық жауаптылыққа әкеп соғатынын ескертті.