Шетелдік азамат SMS-бластердің көмегімен қазақстандықтарға шабуыл ұйымдастырған
Астанада азаматтардың жеке және банктік деректерін иемдену мақсатында фишингтік SMS-хабарламалар таратқан топтың әрекеті әшкере болды. Нәтижесінде қаскөйлер төрт күн ішінде 150 мыңға жуық хабарлама жолдаған, деп хабарлайды Tengrinews.kz прокуратураға сілтеме жасап.
Схема қалай жұмыс істеді?
Прокуратура мәліметінше, 2026 жылдың қаңтарында Оңтүстік-Шығыс Азия елдерінің бірінің азаматы ақшалай сыйақы ұсынып, Қазақстанда заңсыз әрекеттерді ұйымдастыру үшін жергілікті тұрғынды тартқан. Сондай-ақ бұл схемаға жабдықтың жұмысын қамтамасыз еткен басқа да адамдар қосылған.
Жаппай тарату үшін қаскөйлер SMS-бластерді пайдаланған. Бұл құрылғы ұялы байланыстың базалық станциясына еліктеп, операторлардың сүзгілеу жүйелерін айналып өтіп, хабарлама жіберуге мүмкіндік береді.
Төрт күн ішінде қазақстандықтарға 150 мыңға жуық фишингтік SMS түскен. Хабарламалар танымал компаниялардың атынан жіберіліп, бонустарды айырбастау туралы ұсыныстарды қамтыған.
Сілтеме арқылы өткен кезде пайдаланушылар жалған сайтқа тап болып, ол жерде жеке және банктік мәліметтерін, соның ішінде карта деректерін, CVV және SMS-растау кодын енгізу сұралған. Прокуратураның мәліметінше, осылайша қаскөйлер азаматтардың құпия ақпараттары мен банктегі қаражаттарына қол жеткізіп отырған.
Төрт күдікті қамауға алынды
SMS-бластерді Қаржылық мониторинг агенттігінің қызметкерлері тәркіледі. Сараптама бұл құрылғының жедел-іздестіру шаралары мен жасырын тергеу амалдарын жүргізуге арналған арнайы техникалық құралдарға жататынын анықтады.
Қылмыстық іс ҚР Қылмыстық кодексінің 399-бабы 2-бөлігі ("Ақпаратты жасырын алудың арнайы техникалық құралдарын заңсыз дайындау, өндіру, иемдену, өткізу немесе пайдалану") бойынша тергеліп жатыр.
Төрт күдікті қамауға алынды. Сотқа дейінгі тергеу амалдары жалғасып жатыр.