Биектау фермеры Мәскәү туристларын кабул итә
Бүген Биектау районы Ямаширмә авылы фермеры Габделәхмәт Котдусов Мәскәүдән килгән 26 туристны кабул итә.
Башкала кунакларын кабул итү программасына кышкы ял төрләре кергән. Мәскәү кунаклары тәвә кошы, тавис, аккош, тавыкларның сирәк очрый торган төре һәм башка кошлар тәрбияләнә торган вольерда булачак. Шулай ук аларга кышкы балык тоту, чанада шуу, кыюракларына атка атланып йөрү дә тәкъдим ителә. Туристларны кайнар чәй һәм коймак та көтә.
2015 елда фермер хуҗалыгында Россиянең барлык төбәкләреннән дә диярлек 7 меңләп аграр турист кунак булган. Бу алдагы елдан 1 мең кешегә күбрәк дигән сүз.