Каспийде қаза тапқан үш әскери қызметші БҚО-да жер қойнына тапсырылды

Бүгін, 26 қыркүйекте, Маңғыстау облысында болған қайғылы оқиға салдарынан қаза тапқан Батыс Қазақстан облысының әскери қызметшілерін жерлеу рәсімдері өтті, - деп хабарлайды Tengrinews.kz өңір әкімдігінің баспасөз қызметіне сілтеме жасап.

Қаралы жиындарға Батыс Қазақстан облысының әкімі Нариман Төреғалиев, ҚР Құрылтайының депутаттары Тұрарбек Тілемісов пен Мұратбек Мұхамедиев, БҚО прокуроры Нұрбек Ұласбекұлы, Қарулы Күштердің өкілдері, белгілі қоғам қайраткерлері мен өңір тұрғындары қатысты.

Қатысушылар қаза тапқан жауынгерлердің туған-туыстары мен жақындарына қайғырып көңіл айтты. Отан қорғаушылардың рухына Құран бағышталып, еске алу рәсімдері өткізілді.

Мемлекет басшысының тапсырмасына сәйкес, қаза болған әскери қызметшілердің отбасыларына мемлекеттік әлеуметтік төлемдер, материалдық қолдау және жаназа мен жерлеу рәсімдерін ұйымдастыруға қажет жан-жақты көмек көрсетіліп жатыр.

Қаржылай көмекті жинақтау үшін бұған дейін арнайы қор белгіленді. Жинақталған қаражаттың барлығы қаза тапқандардың отбасылары мен зардап шеккендерге атаулы әрі ашық түрде бағытталады. Бұл жұмыс мемлекеттік және құқық қорғау органдарының қатаң бақылауында болады.

Батыс Қазақстан облысының әкімдігі қаза тапқан әскери қызметшілердің отбасыларына, ата-аналары мен туған-туыстарына қайғырып көңіл айтты.

Фото: БҚО әкімдігінің баспасөз қызметі

25 қыркүйекте таңертең Маңғыстауда қаза тапқан батысқазақстандық әскери қызметшілер Жеңіс Темірғалиевтің, Өмірбек Өмірзақтың және Ақжайық Гилаждың мәйіттері Оралға арнайы рейспен жеткізілді.

Сол күні кешке Оралға Каспий теңізінде қаза тапқан тағы бір әскери қызметші – сержант Мансұр Ғұмаровтың мәйіті жеткізілді. Офицермен қоштасу рәсімі 27 қыркүйекте Ақжайық ауданының Жұбан ауылында өтеді.