Қостанайда пәтерден қансыраған ит табылды: күдікті анықталды
Қостанайда жануарға жасалған жантүршігерлік қатігездік оқиғасы тергеліп жатыр. Мойын тұсынан пышақ жарақатын алған ит көп қан жоғалтудан өлді, деп хабарлайды Tengrinews.kz тілшісі Almaty.tv арнасына сілтеме жасап.
Ерікті Анастасия Серикова итті Қостанай тұрғынының пәтерінен дәл осындай күйде – қансыраған және қимылсыз жатқан жерінен тапқан. Оған жануарға көрсетілген қатігездік туралы көршілері хабарлаған. Қызға есікті ұзақ уақыт бойы ашпағаннан кейін ол полиция шақыртқан.
"Түнгі сағат екі шамасында пәтер иесі есікті ашып, итті берді. Жануардың жағдайы өте ауыр еді, мойнында тесіп-кесілген жарақаттар болды, үсті-басы қан екені көрініп тұрды. Біз оны алып кетіп, клиникаға жеткіздік, бірақ ит сол жерде жан тапсырды", - деді Серикова.
Жануарларға қатігездік көрсету дерегі бойынша қылмыстық іс қозғалды. Күдікті анықталып, полиция бөліміне жеткізілді. Қазіргі уақытта тергеушілер қажетті іс-шараларды жүргізіп, оқиғаның мән-жайын анықтап жатыр.
Қостанай облыстық полиция департаменті тұрғындарды мұндай жағдайларға бейжай қарамауға шақырды.
"Егер сіз осындай әрекеттердің куәсі болсаңыз, бейтарап қалмай, 102 нөмірі арқылы полицияға хабарлаңыз. Уақтылы хабар беру жануардың азап шегуіне жол бермей, кінәлілерді жауапқа тартуға көмектеседі", - деп атап өтті облыстық ПД ақпараттық саясат бөлімінің ерекше тапсырмалар жөніндегі аға инспекторы Екатерина Рабцун.
Сонымен қатар, еріктілердің айтуынша, кейінгі кездері Қостанай көшелерінде алабай мен овчарка секілді асыл тұқымды иттер жиі кездесетін болған.
"Адамдар үшін ірі иттердің қараусыз жүруі қалыпты жағдайға айналғандай. Ал шын мәнінде, мұндай жануарлар ерекше жауапкершілікті қажет етеді. Иттің қалай тәрбиеленгені, қандай екені белгісіз, мүмкін ол төбелес үшін үйретілген шығар. Сондықтан бұл жағдайға қатаң бақылау қажет", - дейді жануарлар баспанасының жетекшісі Ольга Соловьева.
Зооеріктілердің мәліметінше, хабарландыру сайттарында асыранды иттер белсенді түрде сатылып жатыр. Бұл ретте көптеген жануарға чип салынбаған, ал өсірушілердің қызметі мен салық төлеу мәселесі күмән тудырады. Ең бастысы – ірі және төбелес иттерінің кімге сатылып жатқанын ешкім тексермейді. Салдарынан тек айналадағыларға ғана емес, жануарлардың өздеріне де қатігез қожайындардың қолына түсу қаупі төніп тұр.