Binance хакерлік шабуылдан кейін ақша шешуге ішінара мүмкіндік берді
Binance криптобиржасы ауқымды хакерлік шабуылдан кейін қаражат шығаруды ішінара қалпына келтірді. Қазіргі уақытта Bitcoin желісі арқылы биткоинді, сондай-ақ Ethereum желісі арқылы ETH, USDT және USDC-ті, BNB Smart Chain және басқа да желілер арқылы BNB, USDT мен USDC-ті шығару мүмкіндігі қайта іске қосылды. Бұл туралы компания өзінің Х желісіндегі парақшасында хабарлады, деп жазады Tengri Life.
Компания шабуылдан кейін платформаны қорғау шаралары қабылданғанын, қауіпсіздік аудиті жүргізіліп, сервистердің жұмысқа дайындығы тексерілгенін мәлімдеді.
Биржа өкілдері депозит салу қызметтерінің ашық екенін және оларға оқыс оқиға әсер етпегенін айтып сендірді.
Қаражат шығару мүмкіндігі кезең-кезеңімен қалпына келтіріледі.
"Біз кейінгі аптадағы пайдаланушылардың сұранысы туралы деректерге сүйеніп, токендерге басымдық бере отырып, кезең-кезеңімен іске қосу тәсілін қолданып жатырмыз. Бұл әрбір желі жұбы мен активтің жұмысын мұқият қалпына келтіру, сондай-ақ қолжетімділік ашылғанға дейін тұрақтылық пен қауіпсіздікті толық тексеру үшін қажет", - делінген мәлімдемеде.
29 қазанда Binance-тің бұрынғы директоры Чанпэн Чжао 6,3 миллиард доллар активке қауіп төндіруі мүмкін хакерлік шабуыл туралы хабарлады. Компания қаражат салу мен шығаруды уақытша тоқтатып, пайдаланушылардың барлық шығынын өтейтінін мәлімдеді.
Қаскөй сервистік контейнерге қол жеткізіп, қаражатты шығару үшін рұқсат етілмеген транзакциялар жіберген деп болжанған.
Күні кеше Binance хакерлік шабуылдан келген шығынның 90 пайызын жапқанын хабарлады.