Қазақстанда депозитке салық салына ма? Ұлттық экономика министрлігі жауап берді

Әлеуметтік желілерде жеке тұлғалардың банктік депозиттері бойынша сыйақыларына салық енгізіледі деген ақпарат тарап жатыр. Алайда Қазақстан Үкіметі мұндай бастаманы қарастырып жатқан жоқ, ал салымдар бойынша пайыздарға бұрынғыша салық салынбайды, деп хабарлайды Tengrinews.kz Президент жанындағы Орталық коммуникациялар қызметінің Дезинформациямен күрес орталығына сілтеме жасап.
Депозиттерге салық енгізу жоспарда жоқ
Ұлттық экономика министрлігі бұған дейін банктік салымдар бойынша сыйақыларға салық енгізілуі мүмкін деген хабарламаларды жоққа шығарған болатын. Министрліктің мәліметінше, Үкімет бұл мәселені қарастырып жатқан жоқ.
Ұлттық экономика министрлігі Қазақстанның Салық кодексінің 430-бабын еске салды. Осы нормаға сәйкес, жеке тұлғалардың банктік салымдар бойынша алатын сыйақыларына жеке табыс салығы салынбайды.
Жалған ақпараттар әлі де тарап жатыр
Ресми түсіндірмелерге қарамастан, әлеуметтік желілерде жаңа салық туралы жазбалар әлі де жарияланып жатыр. Бұған Президент жанындағы ОКҚ Дезинформациямен күрес орталығы назар аударды.

"Орталық азаматтарды ақпарат таратуға, әсіресе негізсіз мазасыздық пен қоғамдық шиеленіс тудыруы мүмкін сезімтал әлеуметтік-экономикалық мәселелерге жауапкершілікпен қарауға шақырады", - делінген хабарламада.

Қазақстандықтарды мұндай хабарламаларды ресми дереккөздер арқылы тексеруге және тексерілмеген ақпаратты таратпауға шақырды. Сондай-ақ азаматтарға заңда қарастырылған белгілер болған жағдайда, көрінеу жалған мәліметтерді қасақана тарату құқықтық бағалауға әкеп соғуы мүмкін екені ескертілді.
Еске сала кетейік, бұған дейін әлеуметтік желілерде қазақстандықтардың бес миллион теңгеге дейінгі несиелері мен айыппұлдарын кешіруге уәде берген роликтер тараған болатын. Пайдаланушыларға арнайы сайтқа өтіп, авторизациядан өту ұсынылған, алайда мұндай уәделердің артында алаяқтық схема жасырылған еді.