Әлмәтлеләр язгы чәчүгә әзерлекне тикшерде [+ФОТОЛАР]
“Чагылтау” хуҗалыгында узган семинар-киңәшмә язгы кыр эшләренә әзерлеккә багышланды.
Хуҗалык җитәкчеләре, фермерлар башта “Чагылтау”ның чәчүдә катнашачак техникасын карады, орлыклар сакланучы амбарлар, аларның торышы белән танышты. Камы-Исмәгыйль язгы чәчүгә тулысы белән әзер булып чыкты. Район башлыгы Айрат Хәйруллин да алардан канәгать калуын белдерде.
Районның авыл хуҗалыгы һәм азык-төлек идарәсе начальнигы Наил Усманов белдергәнчә, районда барлыгы 123 гектар мәйданнан артык авыл хуҗалыгы билгеләнешендәге җир бар. Быел бөтрекле һәм бөртекле-кузаклы культуралар 46230, бәрәңге 87, яшелчәләр 3, техник культуралар 5051, терлек азыгы 20308 гектарда игеләчәк. Чәчүдә361 трактор, 170 чәчкеч, 102 культиватор, 24 чәчүлек комплексы катнашачак. Тракторларның 86, культиваторларның 88 проценты алгы сызыкка куелган. Чәчкечләр белән бернинди проблема юк. Наил Усманов “Чагылтау, “Зәй”, “Кичүчат” хуҗалыкларының яхшы әзерлеген билгеләп үтте. Сосновка, Ташкичү, Яңа Михайловкада ремонт тәмамланмаган әле. 4 апрельдән 10 апрельгә кадәр Авыл хуҗалыгы министрлыгы вәкилләре катнашында техниканы комиссион рәвештә карап йөрү булачак.
Язгы чәчү өчен ташламалы бәяләрдә дизель ягулыгы бүленгән. Быел кыр эшләрен уздыруга китәчәк чыгымнарның тулаем бәясе 287 миллион сум тәшкил итә. 1 гектар чәчүлек җиргә 4004 сум чыгым түгелә икән. Кадрлар кытлыгы да күзәтелә. 88 тракторчыны читтән җәлеп итү күздә тотыла. Район башлыгы тырышып эшләүчеләргә ярдәм булачагын да җиткерде.