Першы віцэ-прэм’ер: Прадпрыемстваў з заробкам да 400 рублёў быць не павінна
"Мы паставілі для сябе задачу: да 1 ліпеня каб гэтых прадпрыемстваў не было", — сказаў першы віцэ-прэм'ер Аляксандр Турчын.
„Што хвалюе ўрад? Тыя кампаніі, якія плацяць людзям неапраўдана нізкую заработную плату. Вось наяўная задача ўрада, усе даручэнні дадзеныя. Мы будзем вельмі жорстка гэта кантраляваць. Першы этап — гэта тыя кампаніі, якія плацяць людзям зарплату менш за 400 рублёў. Мы паставілі для сябе задачу: да 1 ліпеня каб гэтых прадпрыемстваў не было”, — сказаў першы віцэ-прэм’ер.
„У кожнага прадпрыемства ёсць уласнік. Калі вы бачыце, што прадпрыемства не можа працаваць, — прымайце рашэнні кіраўніка: далучайце, прадавайце, ліквідуйце, пры гэтым уладкаваўшы людзей на працу. Але плаціць такую зарплату недазвольна”, — заявіў Турчын.
Паводле яго слоў, міністру па падатках і зборах Сяргею Налівайку даручана па такіх прадпрыемствах „правесці нейкія кантрольныя мерапрыемствы на прадмет таго, ці выплачваецца там зарплата легальна або там палова заробку ідзе ў канвертах”. „Таму мы гэтай праблемай займаемся. А наступны этап — на 1 студзеня 2020 года, гэта прадпрыемствы з заробкам ніжэй за 500 рублёў”, — удакладніў Турчын.
Згодна са звесткамі Нацыянальнага статыстычнага камітэта, сярэдняя намінальная налічаная заработная плата ў красавіку гэтага года ў параўнанні з сакавіком вырасла на 16,8 рубля (на 1,6%) і склала 1.073,7 рубля. Другі месяц запар пасля падзення ў пачатку года яе памер зноў перавысіў тысячу рублёў. Рэальная зарплата (з улікам росту спажывецкіх цэн на тавары і паслугі) у красавіку ў параўнанні з красавіком 2018 года павялічылася на 10%.
Найбольшая сярэднямесячная налічаная зарплата работнікаў у рэгіёнах традыцыйна была ў Менску — 1.551,7 рубля, найменшая — у Магілёўскай вобласці (871).
Самую вялікую зарплату па-ранейшаму атрымліваюць IT-спецыялісты: у красавіку яна склала 4.881,1 рубля. Самая маленькая зарплата была ў цырульнікаў — 555 рублёў. Нізкая зарплата ў творчых і сацыяльных работнікаў — адпаведна 629 і 578,4 рубля, работнікаў бібліятэк, музеяў, архіваў — 576,1 рубля.
Выступаючы 19 красавіка з пасланнем народу і парламенту, Аляксандр Лукашэнка адзначыў, што ў Беларусі ўжо дасягнутыя прыкладна 500 долараў сярэдняй зарплаты ў месяц. „Добра, калі ў нас зарплата будзе калі-небудзь адна тысяча долараў пры тым сацыяльным кошыку, сацыяльнай абароненасці, якая існуе ў краіне. Абсалютна нядрэнна. Але гэта ўжо задача не толькі дзяржавы, не гэтулькі дзяржавы, колькі самога чалавека, працоўных калектываў, прадпрыемстваў”, — падкрэсліў ён.