Набываюць моц нормы заканадаўства, якія датычацца дэкрыміналізацыі бізнесу
Адмяняецца крымінальная адказнасць за незаконную прадпрымальніцкую дзейнасць, акрамя ліцэнзаваных відаў дзейнасці.
18 ліпеня набываюць моц нормы заканадаўства, якія датычацца дэкрыміналізацыі бізнесу, паведаміў журналістам пракурор Менска Сяргей Хмарук перад пачаткам пасяджэння круглага стала „Прававыя пытанні ажыццяўлення прадпрымальніцкай дзейнасці ў Рэспубліцы Беларусь”, арганізаванага Менскім сталічным саюзам прадпрымальнікаў і работадаўцаў.
Набудуць моц нормы, якія рэгулююць крымінальную адказнасць, у тым ліку за эканамічныя злачынствы. Вельмі сур’ёзна змяняецца заканадаўства. Ёсць зрухі ў плане дэкрыміналізацыі, аслаблення крымінальнага „жыму” на бізнес”, — сказаў пракурор.
На яго думку, памяншэнне магчымасцяў быць прыцягнутым да крымінальнай адказнасці за эканамічныя правіны — „гэта для бізнесу лягчэй”. У прыватнасці, прадугледжаны адыход ад канфіскацыі тавару і маёмасці, больш уводзіцца штрафных санкцый замест пазбаўлення волі. Мякчэе пакаранне за тыя ці іншыя злачынствы. „Гэта для бізнесу таксама плюс”, — лічыць Хмарук.
Паводле яго слоў, адмяняецца крымінальная адказнасць за незаконную прадпрымальніцкую дзейнасць, акрамя ліцэнзаваных відаў дзейнасці. „З улікам таго, што ўзяты курс на памяншэнне колькасці ліцэнзаваных відаў дзейнасці, і гэта паслабленне для бізнесу”, — адзначыў пракурор.
„Мы не супраць бізнесу. Не стаіць задача проста злавіць, а яшчэ страшней — усіх у турму пасадзіць. Такой задачы наогул няма. Кіраўнік дзяржавы прапісаў дэкрэт № 7 аб разняволенні дзелавой ініцыятывы, і мы павінны дзейнічаць у фарватары патрабаванняў прэзідэнта”, — падкрэсліў кіраўнік сталічнай пракуратуры.
Ва ўступным слове на круглым стале ён адзначыў, што задача дзяржорганаў — каб бізнес не баяўся дзяржавы і праваахоўных органаў. „Мы не настроены на рэпрэсію. Змяняем акцэнт з практыкі выяўлення якіх-небудзь правапарушэнняў на іх папярэджанне і недапушчэнне”, — сказаў ён.
Паводле слоў Хмарука, пракуратура правяла аналіз новых норм заканадаўства, якія датычацца бізнесу; ён будзе размешчаны на сайце бізнес-саюза.
belapan.by