Адкрыты прыём заяваў на «Заспявай-6»
Сёлета канкурсантам дастаткова даслаць на разгляд сваю песню на любой мове.
Конкурс «Заспявай» ужо шосты раз ладзяць партал TuzinFM і дабрачынны фонд «Вяртанне». Мэта – злучыць сучасную беларускую музыку і сучасную беларускую паэзію. Падчас конкурсу ўдзельнікі конкурсу створаць і запішуць песню на адзін з абраных твораў. Як зрабіць верш песняю можна паглядзець у гэтым відэа.
Заявіцца на конкурс могуць выканаўцы ад 16 да 30 год. Перавага найперш аддаецца тым, хто не мае канцэртнага і студыйнага досведу і працуе (хоча працаваць) у стылях індзі-поп, электроніка і рэп.
Для падачы заявы трэба даслаць прыклад сваёй творчасці (на любой мове) і папярэдне выбраць верш, на які будзе створана песня падчас конкурсу. Выбраць верш і падаць заяву можна на старонцы конкурсу http://tuzinfm.by/zaspiavaj/
З усіх заяваў журы адбярэ паўфіналістаў, якія атрымаюць магчымасць бясплатна паўдзельнічаць у трохдзённай адукацыйнай сесіі, у межах якой пройдуць заняткі па вакалу, саўнддызайну, іміджу і нэймінгу, прома і піар-стратегіі, па працы з лэйбламі і па гісторыі беларускай сучаснай музыкі і паэзіі. Пасля адукацыйнай сесіі канкурсанты будуць мець час, каб самастойна напісаць песню на абраны раней верш ды паказаць яе на жывым праслухоўванні. Па яго выніках журы абярэ тройку фіналістаў, якіх чакае індывідуальная праца з ментарамі і запіс конкурснай песні ў студыі.
У кожнага з фіналістаў будзе персанальны літаратурны кансультант (Андрэй Хадановіч), настаўнік па вакалу (Руся), стыліст і дызайнэр (Наста Шастак), саўндпрадусары (Барыс Календа і Павал Сініла) . Усе ментары ўвойдуць у журы разам з арганізатарамі – Алегам Хаменкам, Сяргеем Будкіным (TuzinFM) і Паўлам Бераговічам (фонд «Вяртанне»).
Песні фіналістаў будуць прэзентаваныя ў сеціве ў фармаце сінглаў і ўжывую на фінальным канцэрце. На ім будзе агучанае імя пераможцы, які атрымае грашовы прыз (1500 BYN) і прома-падтрымку на год.
Прома-ролік шостага сезону – https://youtu.be/3l3ZAgL5JHU
Гісторыя конкурсу за 2 хвіліны – https://youtu.be/x_2lopquVLw
Песні лаўрэатаў і пераможцаў конкурсу – https://soundcloud.com/tuzinhitou/sets/4×4-2014-2016
Паводле прэс-рэлізу