Беларус у сярэднім выкідвае за год да 400 пластыкавых пакетаў
Аб'ём адходаў пластмас штогод павялічваецца, паведаміла дырэктар дзяржаўнай установы «Аператар другасных матэрыяльных рэсурсаў», каардынатар перапрацоўкі камунальных адходаў у краіне Наталля Грынцэвіч.
Кожны беларус у сярэднім выкарыстоўвае і выкідвае да 400 пластыкавых пакетаў за год, аб’ём адходаў пластмас штогод павялічваецца, паведаміла дырэктар дзяржаўнай установы «Аператар другасных матэрыяльных рэсурсаў», каардынатар перапрацоўкі камунальных адходаў у краіне Наталля Грынцэвіч падчас экалагічнага пікета кампаніі «Пакеда, пакет» у Менску 25 верасня.
Ініцыятары пікета – Аператар другасных матэрыяльных рэсурсаў і рух за раздзельны збор адходаў «Мэта 99». Мэта акцыі – матываваць кожнага жыхара краіны выкарыстаць хаця б на адзін пакет менш, чым ён прывык. «Гэты просты пасыл дазваляе дастукацца да ўсіх і паказаць, што маленькая справа, якая не патрабуе вялікіх намаганняў, дапамагае рухацца да вырашэння маштабнай праблемы забруджвання адходамі пластыку. Адмовіцца ад лішняга пакета нескладана, але калі гэта зробіць кожны беларус, штодня будзе расходавацца на 10 млн пластыкавых мяшкоў менш», – адзначыла Грынцэвіч.
Паводле яе слоў, у свеце вырабляецца каля 300 млн тон пластыкавых вырабаў штогод. «Толькі 14% пластыкавай упакоўкі перапрацоўваецца. Яе разнастайнасць прыводзіць да таго, што яе складана сабраць і разабраць, каб потым перапрацаваць», – адзначыла яна.
«У Беларусі, паводле ацэнак экспертаў, штогод з камунальных адходаў утвараецца каля 280 тыс. тон адходаў пластыку. Для перапрацоўкі ў краіне збіраецца ўсяго траціна гэтага абʼёму. За 2018 год было сабрана 86 тыс. тон адходаў пластмас, за шэсць месяцаў 2019 года – каля 47 тыс. тон», – сказала Грынцэвіч.
Паводле слоў каардынатара, экалагічная кампаніі «Пакеда, пакет» уздымае праблему залішняга спажывання пластыкавай упакоўкі ў Беларусі. Яна пачалася ў чэрвені 2019 года з экскурсій і моднага паказу шматразовых заменнікаў пакетаў – экалагічных авосек на смеццевым палігоне «Трасцянецкі» і Смеццесартавальная заводзе Мінска. Затым на адной з краўдфандынгавых платформаў быў арганізаваны распродаж экаторбачак (тэкстыльных сумак). У ёй узялі ўдзел больш за 1 тыс. чалавек.
Затым кампанія засяродзілася на сацыяльнай рэкламе ў сталіцы. Звароты да наведвальнікаў крам скараціць выкарыстанне пластыкавых пакетаў зʼяўляліся на білбордах, на дзвярах гандлёвых цэнтраў. 25 верасня актывісты кампаніі ўсталявалі імітацыю дарожнага знака з заклікам адмовіцца ад аднаразовай упакоўкі каля ТРЦ Dana Mall і Green City.
Кіраўнік Аператара другасных матэрыяльных рэсурсаў адзначыла, што шматлікія гандлёвыя сеткі бачаць сусветную тэндэнцыю па адмове ад пластыкавых пакетаў і самі прапануюць пакупнікам альтэрнатыўную ўпакоўку.
Пікет прымеркаваны саміту ААН па змяненні клімату, які прайшоў 23 верасня ў Нью-Ёрку (ЗША). Да гэтага мерапрыемства ў 156 краінах адбылося больш за 5 тыс. экалагічных акцый пратэсту супраць сучаснага ладу жыцця, які выклікае забруджванне планеты. Адна з актуальных праблем планеты – забруджванне адходамі пластыка. Падчас пікета «Пакеда, пакет» кожнаму ахвотнаму прапаноўвалася пасядзець у басейне, напоўненым пластыкам, і пацвердзіць якое-небудзь сваё экалагічнае абяцанне: напрыклад, пад фразай «Не пакаваць у пакет кожны фрукт» напісаць «Абяцаю». За гэта кожны, хто падпісаў, атрымаў стыкер-напамін пра гэтае абяцанне.