Беларусь ушаноўвае Янку Купалу
Выданне надрукавала шмат матэрыялаў з нагоды 140-годдзя Янкі Купалы.
Artykuł Беларусь ушаноўвае Янку Купалу pochodzi z serwisu БЕЛАРУСКАЕ РАДЫЁ РАЦЫЯ.
„Народны пісьменнік Беларусі Янка Купала – сапраўдны класік сусветнай і беларускай літаратуры, адзін з заснавальнікаў беларускай літаратурнай мовы. Выступаў як паэт, драматург, публіцыст, перакладчык, грамадскі дзеяч.
Сярод яго герояў шмат людзей надзвычайнага лёсу, а тэму сялянскага жыцця беларускі пясняр узняў да філасофскага абагульнення. Ён падняў беларускае мастацкае слова на небывалую вышыню, яго творчасць параўноўваюць з лепшымі ўзорамі сусветнай літаратуры, яно ўяўляе сабой сапраўдную энцыклапедыю жыцця беларускага народа. Ад першага да апошняга верша яно належыць Беларусі і яе нацыянальнай культуры.”
Так пачынаецца адзін з артыкулаў у свежым нумары электроннага выдання “Наша слова. Pdf”, прысвечаны Янку Купалу. Выданне надрукавала шмат матэрыялаў з нагоды 140-годдзя Янкі Купалы. Напрыклад, ДУК „Лідская раённая бібліятэка імя Янкі Купалы” адзначыла 140-годдзе паэта яскравымі і запамінальнымі мерапрыемствамі. Рознабагацце тэматык і форм мерапрыемстваў, якія праводзілі бібліятэкары, характарызуе і Янку Купалу як шматгранную асобу. Гасцей чакалі літаратурныя старонкі і гадзіны, гучныя чытанні, гасцёўні і літаратурна-музычныя вечары, віртуальныя падарожжы і імпрэзы.
Паведамляе “Наша слова” і пра рэспубліканскае свята паэзіі, песні і народных рамёстваў на радзіме Янкі Купалы ў Вязынцы, якое прайшло 9 ліпеня. Адбыўся Купалаў фэст і ў Радашковічах. Як вядома, Янка Купала быў ахрышчаны ў касцёле Найсвяцейшай Тройцы старадаўняга мястэчка Радашковічы і атрымаў імя ў гонар Хрыстовага Папярэдніка Яна Хрысціцеля. Сёлетні Купалаў фэст у Радашковічах складаўся з трох частак. Распачаўся ён традыцыйна святой імшой, пасля якой адбылася музычная праграма і літаратурная імпрэза. Падчас фэсту ў радашковіцкім касцёле гучаў арган XIX стагоддзя, які аднаўляецца з 2018 года. Аднаўленне гістарычнага інструмента адбываецца па ініцыятыве пробашча парафіі Найсвяцейшай Тройцы ў Радашковічах ксяндза каноніка Юрыя Быкава. Рэстаўруе інструмент арганны майстар Маскоўскай філармоніі Дзмітрый Лотаў. У аргане ўжо гучаць 24 галасы.
Важнай падзеяй сёлетняга фэсту стала дабраслаўленне адноўленай мемарыяльнай кампазіцыі, якая нагадвае пра тое, што менавіта ў гэтым касцёле 12 ліпеня 1882 года быў ахрышчаны Ян Луцэвіч – паэт Янка Купала. Аўтар кампазіцыі скульптар Сяргей Гумілеўскі, якому радашковіцкія вернікі дапамаглі ў яе мантажы ў парафіяльнай святыні…
“Наша слова” паведамляе і пра іншыя святы і імпрэзы з нагоды юбілею песняра беларускага народа.
Беларускае Радыё Рацыя
Artykuł Беларусь ушаноўвае Янку Купалу pochodzi z serwisu БЕЛАРУСКАЕ РАДЫЁ РАЦЫЯ.