„Юнацтва”, „Металург” і „Хімік” перамаглі ў матчах хакейнай экстралігі

Трыма хакейнымі матчамі ў Оршы, Наваполацку і Жлобіне працягнуўся рэгулярны чэмпіянат беларускай экстралігі. Цэнтральны паядынак вечара адбыўся ў Жлобіне, дзе дзейны чэмпіён краіны „Металург” прымаў салігорскі „Шахцёр”. Гаспадары мінімальна саступалі ў ліку, але ў фінальнай трэці пераламілі ход гульні і вырвалі перамогу – 2:1. Вырашальны кідок нанёс форвард „ваўкоў” Аляксей Маструкоў. У паралельным матчы лідар турнірнай табліцы „Віцебск” нечакана прайграў „Хіміку” – 3:4. Дублем у складзе навапалачан вызначыўся Арцём Зямлянкін, а перамогу сваёй камандзе прынёс Дзяніс Кірпічонак. У яшчэ адной сустрэчы пятніцы „Юнацтва” ў гасцях адолела „Лакаматыў” – 4:2, тым самым перапыніўшы серыю з трох няўдач. Такім чынам, пасля 13 матчаў сезона ў экстралізе працягвае лідыраваць „Віцебск”, які мае 20 ачкоў. Далей ідуць „Металург”, „Шахцёр” (па 19), „Лакаматыў” (18), „Юнацтва” (17) і „Нёман” (16 ачкоў).

Беларускі нападнік „Северсталі” стаў другой зоркай матчу супраць „Спартака”

Беларускі форвард „Северсталі” Аляксандр Сувораў быў прызнаны другой зоркай матча рэгулярнага чэмпіянату КХЛ са „Спартаком”, які яго каманда прайграла 2:4, паведамляе афіцыйны сайт Лігі.
У сярэдзіне другога перыяду наш суайчыннік вярнуў сваю каманду ў гульню, зраўняўшы лік. Для 19-гадовага форварда, які ўпершыню закінуў за „Северсталь” тыдзень таму, шайба стала чацвёртай у чатырох матчах.

Берасцейскае „Дынама” разграміла „Днепр”

Берасцейскае „Дынама” разграміла „Днепр” у хатнім матчы 24-га тура Беларусбанк — чэмпіянату Беларусі па футболе. Лік сустрэчы 4:0. У першым тайме па голу забілі абаронцы Андрэй Шамрук і Яўген Юдчыц, а напрыканцы гульні нападнікі Сяргей Лынько і Аляксандр Шасцюк дабілі супернікаў. 

Жаночая зборная Беларусі „ўсухую” саступіла расейкам

Жаночая зборная Беларусі па футболе саступіла расейкам у таварыскім матчы на „Барысаў-Арэне” — 0:2. Дублем адзначылася Алёна Рукіна. Каманды правядуць другі спарынг 10 кастрычніка на сталічным стадыёне „Трактар”.

Мэмфіс Дэпай можа стаць гульцом „Ньюкасла”

Нідэрландскі форвард „Барселоны” можа неўзабаве змяніць каталонскі клуб на „Ньюкасл”. Кантракт футбаліста з „Блаўгранай” заканчваецца ў канцы сезона і „сарокі” маюць намер займець гульца, паведамляе TuttoJuve. Такая пастаноўка пытання з боку ангeльскага клуба  прымусіла скарэктаваць планы адносна Дэпая з боку „Ювентуса” і адмовіцца ад прэтэнзій на гульца. 28-гадовы нідэрландзец перайшоў у „Барселону” летам мінулага года на правах свабоднага агента. У 41 матчы за каталонцаў ён забіў 14 галоў і аддаў дзве перадачы.

Юрынок уключаны ў зборную лепшых гульцоў 1-га тура „Дывізіёна Усход” СЕХА-лігі

Беларускі крайні „Мяшкоў Брэст” Андрэй Юрынак уключаны ў зборную лепшых гульцоў 1-га тура „Дывізіёна Усход” СЕХА-лігі. Беларус у матчы з „Машэкам”, які яго каманда выйграла 28:22, паказаў 100-працэнтную рэалізацыю — 6 з 6.

Беларускае Радыё Рацыя

Artykuł „Юнацтва”, „Металург” і „Хімік” перамаглі ў матчах хакейнай экстралігі pochodzi z serwisu БЕЛАРУСКАЕ РАДЫЁ РАЦЫЯ.