Хакеісты менскага „Дынама” прайгралі „Спартаку” у турніры КХЛ
Хакеісты менскага „Дынама” прайгралі 2:3 маскоўскаму „Спартаку” ў чарговым матчы рэгулярнага чэмпіянату Кантынентальнай хакейнай лігі. У складзе «зуброў» вызначыўся Павел Варфаламееў, які працягнуў сваю выніковую серыю да шасці матчаў, а таксама Нік Мёрклі. Гэтая параза стала для падначаленых Крэйга Вудкрафта чацвёртай запар і восьмай у апошніх дзевяці матчах. На дадзены момант „зубры” з 18 баламі размяшчаюцца на 8-м радку Заходняй канферэнцыі, адстаючы ад 7-га месца ўжо на пяць ачкоў. Наступны матч у рэгулярцы КХЛ дынамаўцы правядуць у суботу супраць яраслаўскага „Лакаматыва” – гэтым матчам менчане завершаць выязную серыю.
Жлобінскі „Металург” выйграў чацвёрты матч запар у беларускай экстралізе
Трыма матчамі ў Салігорску, Лідзе і Гомелі працягнуўся рэгулярны чэмпіянат беларускай хакейнай экстралігі. Дзеючы чэмпіён краіны „Металург” у гасцях мінімальна перамог аўтсайдэра чэмпіянату „Лідай”. Пасля двух перыядаў „ваўкі” вялі ў ліку, але за 10 секунд да фінальнай сірэны лідчане перавялі сустрэчу ў авертайм, дзе ўсё ж саступілі – 3:4.
Не хапіла асноўнага часу і „Гомелю” з „Лакаматывам”, зыход гэтай сустрэчы вырашыўся ў серыі булітаў, дзе больш дакладней былі гамяльчане – 3:2. У яшчэ адным паядынку вечара адзін з лідараў сезона „Шахцёр” у Салігорску ўпэўнена справіўся з „Дынама-Маладэчна” – 5:1. Свой бамбардзірскі багаж папоўніў лепшы снайпер „гарнякоў” Міхаіл Стэфановіч, у актыве хакеіста дзве закінутыя шайбы і адна перадача.
Шаранговіч правёў карысную гульню ў прайграным матчы „Нью-Джэрсі”
У матчы рэгулярнага чэмпіянату НХЛ „Нью-Джэрсі” на выездзе прайграў „Філадэльфіі” з лікам 2:5. Беларускі форвард гасцей Ягор Шаранговіч правёў на пляцоўцы 16 хвілін 34 секунды, нанёс два кідкі, заблакаваў два стрэлы і завяршыў сустрэчу з паказчыкам карыснасці „+1”.
Сабаленка выйшла ў чвэрцьфінал турніру ў Сан-Дыега
Беларуская тэнісістка Арына Сабаленка прабілася ў чвэрцьфінал турніру катэгорыі WTA-500 у амерыканскім Сан-Дыега з прызавым фондам 757 тысяч даляраў. Мінулай ноччу пятая ракетка планеты ў 1/8 фіналу ўзяла верх над 52-ім нумарам сусветнага рэйтынгу амерыканкай Слоан Стывенс – 1:6, 6:3, 6:2. Сустрэча працягвалася 2 гадзіны 2 хвіліны. У чвэрцьфінале суперніцай Арыны Сабаленкі будзе харвацкая тэнісістка Донна Векіч.
Кіеўскае «Дынама» пацярпела чацвёртую паразу ў розыгрышы Лігі Еўропы
Кіеўскае «Дынама» саступіла ў матчы 4-га тура групавога этапу Лігі Еўропы з французскім «Рэнам» з лікам 0:1. Сустрэча прайшла ў Кракаве. Адзіны гол у матчы на 48-й хвіліне забіў абаронца Крыстафер Ву. „Дынама” саступіла ў чацвёртай сустрэчы ў рамках бягучага розыгрышу Лігі Еўропы, у актыве ўкраінскай каманды нуль балаў за чатыры матчы. Кіяўляне замыкаюць табліцу групы B. У «Рэна» 10 ачкоў пасля чатырох сустрэч, каманда займае другое месца. Гол Мактамінэя на 93-й хвіліне прынёс «МЮ» перамогу над «Амоніяй» 1:0. Іспанскі „Беціс” на хатняй арэне згуляў унічыю з „Ромай” з лікам 1:1.
Левандоўскі: Калі „Залаты мяч” не адменяць, яго выйграе Бензема
Форвард „Барселоны” Роберт Левандоўскі лічыць, што французскі нападнік „Рэала” Карым Бензема з’яўляецца фаварытам у барацьбе за „Залаты мяч”. Абодва гульцы прэтэндуюць на ўзнагароду, цырымонія ўручэння прыза пройдзе 17 кастрычніка. Дзеючым уладальнікам прыза з’яўляецца Ліянэль Месі. „Калі „Залаты мяч” не адменяць, то ён, хутчэй за ўсё, выйграе гэты прыз, так”, – прыводзіць словы Левандоўскага выданне Goal. У мінулым сезоне Бензема ў 32 матчах іспанскага першынства забіў 27 мячоў, у Лізе чэмпіёнаў у 12 матчах француз вызначыўся 15 разоў. Левандоўскі ў складзе „Баварыі” вызначыўся 35 галамі ў 34 матчах Бундэслігі, у Лізе чэмпіёнаў паляк забіў 13 галоў у 10 гульнях.
У фінале жаночага чэмпіянату свету па валейболе згуляюць Сербія і Бразілія
Жаночая зборная Бразіліі па валейболе абыграла каманду Італіі ў паўфінальным матчы чэмпіянату свету. Сустрэча ў нідэрландскім Апелдорне завяршылася з лікам 3-1 на карысць бразільянак. За залатыя медалі бразільянкі паспрачаюцца са зборнай Сербіі. Фінальная сустрэча адбудзецца 15 кастрычніка. Італьянкі ў той жа дзень згуляюць у матчы за трэцяе месца з камандай ЗША.
Беларускае Радыё Рацыя
Artykuł Хакеісты менскага „Дынама” прайгралі „Спартаку” у турніры КХЛ pochodzi z serwisu БЕЛАРУСКАЕ РАДЫЁ РАЦЫЯ.