Жлобін – «самы экстрэмісцкі» горад Беларусі
Гомельскае выданне «Флагшток» прааналізавала складзены лукашэнкаўскімі сілавікамі спіс нядобранадзейных для ўладаў грамадзян і ацаніла праз яго маштабы рэпрэсій ды рэгіянальныя адметнасці.
Artykuł Жлобін – «самы экстрэмісцкі» горад Беларусі pochodzi z serwisu БЕЛАРУСКАЕ РАДЫЁ РАЦЫЯ.
Гомельскае выданне «Флагшток» прааналізавала складзены лукашэнкаўскімі сілавікамі спіс нядобранадзейных для ўладаў грамадзян і ацаніла праз яго маштабы рэпрэсій ды рэгіянальныя адметнасці.
28 кастрычніка ў «спіс экстрэмістаў» унеслі адразу 625 чалавек. Цяпер ён уключае ўжо ажно 1 469 чалавек.
Да цяперашняга моманту ў грамадстве склалася меркаванне, што аснова пратэснай аўдыторыі і самы магутны рэпрэсіўны апарат «сілавікоў» сканцэнтраваныя ў Менску. Але чым больш папаўняецца спіс экстрэмістаў, тым больш становіцца відавочна, што гэта не зусім так.
Так, на гэты момант у спіс уключаны «толькі» 391 менчанін, у той час як па-за межамі Менска і нават абласных цэнтраў жывуць больш за 700 чалавек. З іх 206 — з сельскай мясцовасці і гарадскіх пасёлкаў. А кожны пяты «экстрэміст» жыве ў Гомельскай вобласці, яна і з’яўляецца лідарам па гэтым паказчыку сярод абласцей — 293 чалавекі. Крыху менш — у Берасцейскай вобласці, 253. А найменш «экстрэмістаў» на Магілёўшчыне — «толькі» 74.
Сярод абласных цэнтраў лідар па колькасці «экстрэмістаў» — Берасце. На сёння ў спісе знаходзяцца 115 берасцейцаў. На трэцім месцы пасля Менска і Берасця — Гомель са 111 людзьмі. А самае цікавае, што ў топ-5 «самых экстрэмісцкіх» гарадоў Беларусі нечакана ўвайшоў і адзін райцэнтр Гомельшчыны — Жлобін (84 чалавекі).
Калі зыходзіць са звестак сілавікоў, то Жлобін, безумоўна, можна назваць «самым экстрэмісцкім» горадам Беларусі. Тут на тысячу жыхароў прыпадае больш за аднаго «экстрэміста». Ён безумоўны лідар у гэтым плане па ўсёй Гомельскай вобласці, у якой цяпер толькі пяць раёнаў (Акцябрскі, Брагінскі, Лельчыцкі, Лоеўскі і Нараўлянскі) не маюць сваіх «экстрэмістаў».
Пры гэтым, як падкрэслівае «Флагшток», многіх вядомых фігурантаў палітычна матываваных крымінальных спраў у спісе «экстрэмістаў» пакуль няма. А гэта значыць, што пакуль мы і тут назіраем толькі бачную частку айсберга.
Artykuł Жлобін – «самы экстрэмісцкі» горад Беларусі pochodzi z serwisu БЕЛАРУСКАЕ РАДЫЁ РАЦЫЯ.