Беларускі хаб «Новая Зямля» у Беластоку афіцыйна адчыніў свае дзверы
Гэта адкрытая пляцоўка для разнастайных культурніцкіх і адукацыйных ініцыятыў, якая прэзентуе сябе як прастору вольных беларусаў. 30 верасня хаб «Новая Зямля» быў зарэгістраваны як недзяржаўная арганізацыя ў Польшчы, актывістам удалося знайсці для яго вялікае памяшканне.
Кажа Надзея Салаўёва – адна з ініцыятараў з’яўлення беларускага хаба ў Беластоку:
„Гэта прастора вольных беларусаў, дзе кожная арганізацыя, ініцыятыва, актывіст можа прыйсці і зладзіць сваю ідэю ці праект. Калі няма ідэі ці праекту, але ёсць задума, то мы можам дапамагчы давесці яе да ладу. Гэта такое месца для прыцягнення беларусаў, для захавання беларускай ідэнтычнасці, культуры. Дзе мы можам нешта рабіць і працаваць на карысць будучай дэмакратычнай Бацькаўшчыны.”
На адкрыцці хаба «Новая Зямля» у Беластоку сабралася мноства гасцей і ўдзельнікаў. Сярод выступоўцаў быў дэпутат польскага Сейма Робэрт Тышкевіч, які пажадаў поспехаў новай беларускай прасторы:
„Прывітанне дарагія сябры! Вы – надзея на будучыню Беларусі, мусіце пра гэта ведаць. Наш польскі досвед, што эміграцыя і дыяспара можа адыграць вялікую ролю ў змаганні за сваю Радзіму”
Госцем мерапрыемства таксама быў прафесар Алег Латышонак, які распавёў пра сваё разуменне назвы беларускага хаба «Новая Зямля»:
„Я гэта разумею так, што беларусы якія сюды прыехалі, знайшлі новую зямлю. Новая зямля па-коласаўску гэта таксама свая зямля. Вядома, што большасць, што страціла сваю зямлю – сімвалічна яна ў Беларусі. Але думаю што знайшлі тут новую, і што гэта будзе іхная зямля. Таксама спадзяюся, што новыя беларусы знойдуць тут сваё месца. Яны – наша надзея.”
На адкрыцці беларускага хаба выступілі музыкі: Кацярына Ваданосава, якой дапамагала дачка Стэфа, а таксама Ігар Палынскі. Хаб «Новая зямля» анансаваў стварэнне інтэрнэт-старонкі, дзе будзе размешчаны каляндар падзей, цяпер за дзейнасцю прасторы можна сачыць праз сацыяльныя сеткі. Размешчаны хаб блізу беластоцкага аўтавакзала па вуліцы Wyszyńskiego 6A, і пакуль што будзе адкрыты толькі падчас мерапрыемстваў.
Беларускае Радыё Рацыя
Artykuł Беларускі хаб «Новая Зямля» у Беластоку афіцыйна адчыніў свае дзверы pochodzi z serwisu БЕЛАРУСКАЕ РАДЫЁ РАЦЫЯ.