„Дынама” прайграла восьмы матч запар у КХЛ
У заключным матчы года менчане прымалі маскоўскі "Спартак".
Artykuł „Дынама” прайграла восьмы матч запар у КХЛ pochodzi z serwisu БЕЛАРУСКАЕ РАДЫЁ РАЦЫЯ.
Хакейнае менскае „Дынама” паразай завяршыла каляндарны год у чэмпіянаце Кантынентальнай хакейнай лігі.
У заключным матчы года менчане прымалі маскоўскі „Спартак”. Першыя закінутыя шайбы гледачы на „Менск-Арэне” ўбачылі ўжо ў другім перыядзе: каманды двойчы абмяняліся ўзяццямі брамкі, за „зуброў” вызначыліся Джозэф Душак і навічок клуба Мікіта Зоркін. Па ходу заключнай трэці „Дынама” дзякуючы Брэндану Козуну і Раману Гарбунову павяло ў дзве шайбы, аднак гульцам „Спартака” ўдалося ператварыць лік 2:4 у 5:4 на сваю карысць. Але і гэта было яшчэ не ўсё – незадоўга да фінальнай сірэны форвард мінчан Дзмітрый Сакалоў зноў аднавіў парытэт. У авертайме выявіць пераможцу каманды не змаглі, а серыя пасляматчавых кідкоў лепш удалася масквічам. Як вынік – 5:6, „Дынама” зноў саступае.
Такім чынам, падначаленыя Крэйга Вудкрафта не могуць набраць ачкі ўжо ў васьмі матчах запар. З-за правальнай серыі беларуская каманда выпала з васьмёркі лепшых на Захадзе: „зубры” ідуць у сваёй канферэнцыі 9-мі, адстаючы ад зоны плей-оф на тры ачкі.
Дзмітрый Бага пакінуў „Гомель”
Беларускі паўабаронца Дзмітрый Бага пакінуў „Гомель”.
Футбаліст не збіраецца працягваць кантракт з „рысямі”, паведамляе football.by. У мінулым сезоне футбаліст правёў 16 матчаў у складзе „Гомеля” ў вышэйшай лізе, у якіх забіў адзін гол.
Гардзяйчук прадоўжыў кантракт з берасцейскім „Дынама”
Нападнік Міхаіл Гардзяйчук працягнуў кантракт з берасцейскім „Дынама”.
Пагадненне з футбалістам разлічана на два гады, да канца сезона-2024.
Складана пераацаніць важнасць Міхаіла для „Дынама” узору 2022 года. Улетку ён вярнуўся ў каманду, дзе з 2019 па 2020 гады правёў 52 матчы забіў 18 галоў і аддаў 5 галявых перадач.
За паўгода вінгер прыняў удзел у пятнаццаці гульнях вышэйшай лігі, дзе забіў пяць мячоў і яшчэ шэсць разоў асіставаў партнёрам.
Смольскі, Пракапенка і Байкоў атрымалі прэмію „Беларускі спартовы Алімп”-2022
Біятланіст Антон Смольскі, пяціборка Анастасія Пракапенка і трэнер па веславанні Віктар Байкоў атрымалі прэмію „Беларускі спартовы Алімп”-2022 за актыўную дзейнасць па папулярызацыі фізічнай культуры і спорту.
Капітан нацыянальнай каманды па біятлоне, майстар спорту міжнароднага класа Антон Смольскі – срэбраны прызёр зімовых Алімпійскіх гульняў 2022 года, прызёр этапаў Кубка свету.
Заслужаны майстар спорту Рэспублікі Беларусь Анастасія Пракапенка – шматразовая чэмпіёнка свету і Еўропы па сучасным пяцібор’і. Яна прымала ўдзел у чатырох Алімпіядах, з’яўляецца бронзавым прызёрам Алімпійскіх гульняў 2008 года.
Заслужаны трэнер Рэспублікі Беларусь Віктар Байкоў з 1982 года працуе ў Гомельскім дзяржаўным вучылішчы алімпійскага рэзерву. Ён падрыхтаваў заслужанага майстра спорту Рэспублікі Беларусь Марыну Літвінчук – трохразовага прызёра Алімпійскіх гульняў.
Месі і Пуцельяс прызнаны лепшымі спартоўцамі 2022 года па версіі AIPS
Футбалісты прызнаны лепшымі спартоўцамі 2022 года па версіі Міжнароднай асацыяцыі спартовай прэсы (AIPS).
У мужчын усіх апярэдзіў чэмпіён свету аргенцінскі нападнік французскага клуба „Пары Сэн-Жэрмэн” Ліянэль Месі, які атрымаў 962 галасы. На другой пазіцыі шведскі скакун з шастом Арман Дзюпланціс, трэцяе месца ў аднаклубніка Месі французскага форварда Кіліяна Мбапэ. Сярод жанчын лепшай спартоўкай адыходзячага года стала паўабаронца футбольнай зборнай Іспаніі і „Барселоны” Алексія Пуцельяс. Другое месца ў амерыканскай плыўчыхі Кэці Ледэкі, на трэцяй пазіцыі венесуэльская лёгкаатлетка Юлімар Рохас. У галасаванні прынялі ўдзел 420 журналістаў са 113 краін свету.
Беларускае Радыё Рацыя
Artykuł „Дынама” прайграла восьмы матч запар у КХЛ pochodzi z serwisu БЕЛАРУСКАЕ РАДЫЁ РАЦЫЯ.