Павел Усаў: Расея пагражае ўсяму цывілізаванаму свету
Ці сапраўды Еўропа выкарыстоўвае не ўсе рэсурсы, каб перамагчы агрэсію Расеі?
Artykuł Павел Усаў: Расея пагражае ўсяму цывілізаванаму свету pochodzi z serwisu БЕЛАРУСКАЕ РАДЫЁ РАЦЫЯ.
У Давосе ўкраінцы гаварылі пра тое, што толькі глабальная супраца дапаможа спыніць расейскую агрэсію. Еўропа мае шмат рэсурсаў, але да канца гэта не выкарыстоўваецца, каб перамагчы агрэсію РФ.
Ці сапраўды Еўропа сёння не ўсе рэсурсы выкарыстоўвае, каб перамагчы Расею? Сваё меркаванне ў нашым эфіры выказаў палітычны аналітык Павел Усаў:
-Гэта відавочна, што Расея пагражае не толькі Украіне, а ўсяму цывілізаванаму свету. І тым больш трэба сказаць, што зараз якраз падчас вайны супраць Украіны кансалідаваліся аўтарытарныя рэжымы, якія дапамагаюць Расеі не прайграць гэтую вайну. Я кажу, напрыклад, пра Іран, Кітай, якія ў абыходжанне санкцый мэтанакіравана падтрымліваюць Расею матэрыяльна-тэхнічнымі і вайсковымі сродкамі. І ў дадзеным кантэксце адбываецца ўсеагульнае сусветнае супрацьстаянне дэмакратычнага ладу таталітарнаму ўпарадкаванню, на чале якога стаіць Расея. Бо параза Расеі ў гэтай вайне па сутнасці будзе азначаць новы этап дэмакратызацыі ва ўсім свеце – глабальнай дэмакратызацыі. Гэта будзе датычыць Ірана, Кітая. І гэтыя сістэмы, антызаходнія, антыдэмакратычныя, вельмі добра разумеюць і таму максімальна імкнуцца да таго, каб Расея ў вайне не прайграла.
На жаль, такога кансалідаванага і глабальнага разумення з боку ўсіх дэмакратычных краінаў, нягледзячы на маральную і тэхнічную падтрымку для Украіны, не існуе. Працягваецца і прысутнічае, нягледзячы на ўвесь драматызм падзей ва Украіне, погляд неабходнасці шукаць кампраміс і цалкам не ізаляваць Расею, а пакінуць для яе прастору для нейкага дыялогу. Нават ёсць „праграма мінімум”, „праграма максімум”. Вось „праграма максімум” для шмат якіх еўрапейскіх краінаў – гэта фактычна скончыць вайну на тых межах, дзе яна пачыналася. Разуменне таго, што Украіна павінна вызваліць усе тэрыторыі, таксама Крым, не ва ўсіх заходніх краінах існуе. Усё абмяжоўваецца неабходнасцю Украіны абараніць свае жыццёвыя інтарэсы.
А як павінна развівацца палітыка пасля дасягнення „праграмы мінімум”, яна не агучваецца. Нейкага яснага падыходу няма. Магчыма гэта вынікае са страху таго, што Захад баіцца правакаваць Расею на нейкія далейшыя жудасныя дзеянні, перарастанне гэтай вайны ў ІІІ Сусветную, але абсалютна адсутнічае разуменне сутнасці расейскай улады і расейскай сістэмы. Калі будзе патрэбна, не важна, што зробіць Захад – ці будзе поўзаць на каленях і ўмаляць Пуціна нечага не рабіць, ён гэта зробіць. Калі гэта будзе звязана з ягоным хворым разуменнем сітуацыі ў свеце.
РР: З’явілася інфармацыя, што ў лютым ЕЗ можа прыняць новыя санкцыі супраць Беларусі і Расеі. Які ваш каментар наконт чарговага пакета санкцый?
Павел Усаў: Санкцыі недастатковыя. Яны неабходныя, і яны павінны быць вельмі жорсткімі. Але самае важнае, што можа спыніць гэтую вайну – гэта сістэмнае, фундаментальнае пераўзбраенне Украіны. Гэта забеспячэнне Украіны ўсімі сучаснымі сродкамі вядзення вайны.
Цалкам гутарку слухайце ў далучаным гукавым файле:
Беларускае Радыё Рацыя
Artykuł Павел Усаў: Расея пагражае ўсяму цывілізаванаму свету pochodzi z serwisu БЕЛАРУСКАЕ РАДЫЁ РАЦЫЯ.